Institýt sarapshylary búgingi tańda baǵdarlamanyń prototipin jasap, onyń negizgi modýlderin anyqtap, bekitti.
Aqparattyq júie interfeisiniń dizainy pysyqtalyp jatyr. Budan basqa, avtomobil kópirleri men jol ótpeleriniń tehnikalyq jai-kúiin baǵalaý ádistemesi ázirlendi.
Qazir QazjolǴZI mamandary Almaty, Jambyl, Túrkistan, Aqmola, Soltústik Qazaqstan jáne Pavlodar oblystarynyń kópirlerin tekserý nátijelerin óńdeýde.
Júiege tórt qurylym engizildi. Atap aitqanda, Qarqara aýylynyń janyndaǵy «Kókpek-Kegen-TIýP» jolyndaǵy kópir, Saryjas aýylynyń janyndaǵy «Kegen-Narynqol», Almaty oblysy Kóktal aýylynyń janyndaǵy Esik jáne Saryózek-Kóktal aýylynyń janyndaǵy «Almaty-Talǵar-Báidibek bi». Jyldyń sońyna deiin bazaǵa alǵashqy 20 kópirdi engizý josparlanyp otyr.
– Qazaqstanda respýblikalyq mańyzy bar joldarda barlyǵy 1500 myńǵa jýyq kópir qurylymy bar. Olardyń barlyǵy keiinnen tsifrlandyrylady. Alaida, bizdiń basty mindetimiz – jyl sońyna deiin tolyq jumys isteitin júieni qurý.
Júie daiyn bolǵannan keiin sarapshylar júieni qalǵan kópirlermen tolyqtyra bastaidy. Kópirlerdi paidalanýdy basqarý júiesin 2023 jyldyń jeltoqsanynda tájiribelik turǵyda paidalanýǵa berýdi josparlap otyrmyz, – dedi «QazjolǴZI» AQ Avtojoldar jáne kópir qurylystary departamentiniń bas mamany Qaisar Shalqar.
Aita keterligi, qazaqstandyq kópirler, jol airyqtary jáne avtomobil men temirjol joldary arqyly ótetin jol ótkelderi týraly derekter áli kúnge deiin memlekettik organdarda qaǵaz qujattarda saqtalady. Bul óz kezeginde strategiialyq jol obektilerin zertteý, jóndeý, jańǵyrtý, rekonstrýktsiialaý jáne olardyń qurylysyn josparlaý jáne júrgizý jónindegi jumysty qiyndatady.
Kópirlerdiń tsifrlyq bazasyn qurý kezinde mamandar Daniia, Finliandiia, Germaniia, Norvegiia, Ońtústik Afrika, Shvetsiia, Shveitsariia jáne Ulybritaniianyń tájiribesine súiendi. Kópirlerdi paidalanýdy basqarý júiesi – bul qurylystar týraly ózekti elektrondyq málimetterdi, sonyń ishinde árbir obektiniń pasporttyq derekterin jáne olardyń aǵymdaǵy jai-kúiin tekserý nátijelerin jinaityn zamanaýi aqparattyq júie.
Joba sheńberinde drondardyń kómegimen respýblikalyq mańyzy bar avtojoldardaǵy barlyq kópir qurylysy men jol ótpeleri tsifrlandyrylatyn bolady. Derekter Kólik jáne jol qurylysy salasyndaǵy ýákiletti memlekettik organdarǵa, jobalaý jáne jol-qurylys uiymdarynyń qyzmetkerlerine jasandy qurylystardyń biryńǵai bazasynyń saitynda qoljetimdi bolady.
Atalǵan júie paidalanýshylarǵa belgili bir obekt týraly qajetti derekterdi tez tabýǵa, sondai-aq kópirler men ótkelder kútip ustaý boiynsha esepter men biýdjetti josparlaýdy avtomattandyrýǵa múmkindik beredi.
Álemdik tájiribe kórsetkendei, ýaqtyly jáne turaqty diagnostika, sonymen birge baqylaý men taldaý aqaýlardy erte kezeńderde anyqtaýǵa jáne joiýǵa múmkindik beredi. Osylaisha, Kópirler men basqa obektilerdi kútip ustaý shyǵyndarynyń aitarlyqtai tómendeýine qol jetkizýge bolady.
