Búgin QR Aqparat jáne qoǵamdyq damý mınıstri Darhan Qydyráli óziń Feısbýktaǵy paraqshasynda Qazaqstandaǵy merekelik kúnderdiń tizbesi jańa merekelermen tolyqqanyn habarlady.

Halyqaralyq bekitilgen kúnderge sáıkes «Analar kúni» merekesi mamyr aıynyń ekinshi jeksenbisinde, «Ákeler kúni» merekesi maýsymnyń úshinshi jeksenbisinde aýqymdy túrde atap ótiledi.

Halqymyzdyń «Otan otbasynan bastalady» degen naqyl sóziniń máni tereńde jatsa kerek. Memleket basshysy Qasym-Jomart Toqaev: «Berekeli ári baqytty otbasy qýatty eldiń tiregi», – degeni belgili.

Otbasyn nyǵaıtatyn faktorlardyń biri – áýlet músheleriniń birge ýaqyt ótkizýi, ortaq qýanyshty birge atap ótýi ekeni anyq. Mınıstrlikke qarasty Qazaqstandyq qoǵamdyq damý ınstıtýtynyń «Qazaqstandyq otbasylar» ulttyq baıandamasynda kórsetilgendeı, elimizdegi otbasylyq dástúrlerdiń dińgegi – áýlet músheleriniń týǵan kúnin atap ótý eken. Bul saýalnamaǵa qatysqan 86%-dan astam respondenttiń oı-pikiri. Sondaı-aq otbasylardyń jartysynan kóbi jańa jyl, 8 naýryz, 22 naýryz jáne taǵy basqa memlekettik merekelerdi ataǵan.
Sol sebepti bekitilgen áziz ákeler men ardaqty analarǵa arnalǵan bul ataýly merekeler ulttyq bolmysymyzǵa saı jańa mazmunda toılanyp, jalpyhalyqtyq sıpat alady degen oıdamyz.

Atalǵan merekeler otbasy ınstıtýtyn nyǵaıtýǵa, analarymyz ben ákelerimizdiń mártebesin kóterýge, otbasylyq qundylyqtardy damytýǵa, áýlettegi jaqyndyqtyń, qurmet-yqylastyń berik ornaýyna jáne otbasyndaǵy bereke-birliktiń artýyna yqpal etedi dep senemiz.

Ákeler kúni demekshi, osydan 40 jyl buryn ardaqty ákemiz máńgilik saparǵa attanǵan edi. Ómirden erte ozǵan ákemizdiń jarqyn beınesi, ol týraly jyly estelikter áli kún jadymyzda. Sondyqtan ákege, anaǵa qurmet, kóz tirisinde qadirine jetý árdaıym kóńil tórinde turýǵa tıis dep bilemiz.

Búgingi Balalar quqyǵyn qorǵaý kúninde paıda bolǵan máni zor merekeler qutty bolsyn! Ákelerimiz ben analarymyz aman bolsyn!