Qazaqstanda eńbek kúshi tapshy óńirlerge erikti túrde qonys aýdaratyn azamattardy qoldaý baǵdarlamasy jańartyldy. Endi ekonomikalyq utqyrlyq sertifikatynyń eń joǵary mólsheri 7 mln teńgege deiin (1625 AEK) ulǵaityldy. Bul qarajatty qonys aýdarýshylar jańa óńirden baspana satyp alýǵa paidalana alady. Bul týraly Eńbek jáne halyqty áleýmettik qorǵaý ministrligi málimdedi, dep habarlaidy dalanews.kz.
"Engizilgen ózgeristerdiń basty maqsaty – azamattardyń tek óńir aýystyrýyna emes, jańa jerde turaqtap, baspanaly bolyp, ómirin jaily bastaýyna múmkindik jasaý", - dedi vedomstvo.
Baǵdarlama aiasynda ekonomikalyq utqyrlyq sertifikatynan bólek, kóship-qoný shyǵyndary sýbsidiialanady, turǵyn úidi jaldaý men kommýnaldyq qyzmetterge jumsalatyn shyǵyndardyń bir bóligi óteledi. Sondai-aq qatysýshylarǵa jumysqa ornalasýǵa qoldaý kórsetiledi. Ministrlik málimetinshe, azamattar qonys aýdarmai turyp-aq bos jumys oryndarymen tanysyp, jumys berýshini tańdai alady. Ol úshin kóship shyǵatyn óńirlerde qabyldaýshy oblystardyń qatysýymen bos jumys oryndary jármeńkesi uiymdastyrylady.
Sonymen qatar baǵdarlamaǵa qatysýshylardyń sanaty da keńeitildi. Buǵan deiin ol negizinen jumyssyz azamattarǵa arnalsa, endi memlekettik qoldaý suranysqa ie mamandar men sharýa jáne fermer qojalyqtarynyń basshylaryna da qoljetimdi bolady.
Ministrliktiń habarlaýynsha, baǵdarlama barynsha tsifrlandyrylǵan. Ótinim berý, qonys aýdarýǵa bolatyn óńirler kartasyn, suranysqa ie mamandyqtar tizimin qarap, bos jumys ornyn tańdaý qyzmetteriniń barlyǵy migration.enbek.kz portaly arqyly onlain júzege asyrylady.
Aita keteiik, 2017 jyldan beri bul baǵdarlamaǵa 73,9 myń adam qatysqan. Onyń ishinde 31 myń adam jumyspen qamtýǵa járdemdesý sharalary arqyly turaqty jumysqa ornalasqan.
