Elbasy Belarýs prezidentimen kezdesti
Memleket basshysy Qazaqstan men Belarýs arasyndaǵy bailanystardyń tarihi turǵydan ornyqqan dostyq sipaty bar ekenin atap ótti.
– Tarihi turǵydan qysqa ýaqyt ishinde aitarlyqtai jetistikterge qol jetkizdik. Biz qiyn jaǵdailarda ekijaqty yntymaqtastyqtyń myqty saiasi bazasyn qurdyq. Memleketterimiz ashyq ári senimdi qarym-qatynastaǵy berik áriptes bolyp sanalady, – dedi Qazaqstan Prezidenti.
Nursultan Nazarbaev biylǵy Qazaqstan men Belarýs arasyndaǵy saýda-ekonomikalyq yntymaqtastyǵynyń damý qarqynyna oń baǵa berdi.
Sondai-aq, prezident ortaq integratsiialyq birlestik – Eýraziialyq ekonomikalyq odaq aiasyndaǵy Qazaqstan men Belarýstiń ekonomikalyq turǵydan ózara tyǵyz is-qimyl jasap otyrǵanyna toqtaldy.
– Qazaqstanda Belarýs Respýblikasynyń 260 kásiporny, birlesken iri 6 avtomobil qurastyrý zaýyty jumys isteidi. Elimizdegi dúkender sórelerinde Belarýstiń aýyl sharýashylyǵy ónimderi satylýda, – dedi Memleket basshysy.
Aleksandr Lýkashenko Qazaqstan Prezidentiniń bul sapary ekijaqty yntymaqtastyqty odan ári nyǵaitý turǵysynan mańyzdy ekenin atap ótti.
– Sizdiń búgingi saparyńyz elderimizdiń taýar ainalymyn arttyrýǵa serpin beretinine senimdimin. Ol úshin bizdiń múmkindikterimiz zor, – dedi Belarýs Respýblikasynyń Prezidenti.
Budan keiin eki eldiń isker toptary ózara basqosty. Kelissóz barysynda saýda, ózara investitsiia, qarjy quraldary, bilim jáne aqparattyq tehnologiialar, turǵyn úi jáne jol qurylysy salalaryndaǵy ózara strategiialyq yntymaqtastyq máseleleri qarastyryldy. Sondai-aq, Eýraziialyq ekonomikalyq odaq aiasynda transulttyq korporatsiialar qurý máseleleri talqylandy.
Nursultan Nazarbaev Saýda-ekonomikalyq yntymaqtastyq jónindegi úkimetaralyq komissiia jumysy aiasyndaǵy ekijaqty ýaǵdalastyqtardyń mańyzy zor ekenin atap ótti.
– Biz Úkimetaralyq komissiianyń teń tóraǵalaryna naqty tapsyrmalar berdik. Sonymen qatar kún tártibindegi ózekti halyqaralyq jáne óńirlik taqyryptar boiynsha pikir almastyq, – dedi Qazaqstan Prezidenti.
Budan bólek, Memleket basshysy eki el arasyndaǵy kólik-tranzittik yntymaqtastyqtyń ózekti ekenin aityp, Qazaqstan men Belarýs arqyly tasymaldanatyn júkter kóleminiń artyp kele jatqanyna nazar aýdardy.
Nursultan Nazarbaev Belarýstiń aqparattyq tehnologiialar salasyndaǵy jetistikterin joǵary baǵalap, osy saladaǵy ózara is-qimyldyń perspektivalaryn aiqyndady.
– Elderimiz aqparattyq tehnologiialardy damytýǵa zor mán berip otyr. Bizde «Alataý» aqparattyq tehnologiialar parki bar, Nazarbaev Ýniversitetinde zertteýler júrgizilýde, «EKSPO-2017» bazasynda IT-startaptar halyqaralyq tehnoparki qurylýda, – dedi Qazaqstan Prezidenti.
Belarýs Respýblikasynyń Prezidenti Qazaqstan-Belarýs arasyndaǵy ekonomikalyq qarym-qatynasta ósimniń tómendeýi eńserile bastaǵanyn aitty.
– Sizdiń búgingi saparyńyz eki eldiń taýar ainalymyn arttyrýǵa múmkindik beredi. Bul rette Úkimetterimiz músheleri men sarapshylar túrli nusqa men ózekti sheshimder usynady, – dedi Aleksandr Lýkashenko.
Taraptar kelissóz barysynda talqylanǵan aýqymdy máseleler jóninde utymdy tásilder men sheshimder ázirleý úshin Eýraziialyq ekonomikalyq odaqqa múshe memleketterdiń dialogyn jandandyrý qajettigin atap ótti.
***
Memleket basshysy Belarýs Respýblikasyna resmi sapary aiasynda ótken kelissózderdi qorytyndylady.
Qazaqstan Prezidenti berik áriptes sanalatyn eki el arasyndaǵy qarym-qatynastardyń ashyq ári senimdi sipaty bar ekenin aitty.
– Búginde bizdiń aramyzda ózara ońtaily sheshimi tabylmaǵan másele joq. Biz ekijaqty kún tártibiniń keń aýqymdy máselelerin qarastyrdyq, – dedi Nursultan Nazarbaev.
Aleksandr Lýkashenko ekijaqty qarym-qatynas jáne integratsiialyq birlestik turǵysynan strategiialyq yntymaqtastyqtyń mańyzdylyǵyn atap ótti.
– Biz 25 jyl ishinde jai dos qana emes, sondai-aq strategiialyq, ekonomikalyq serikteske ainaldyq. Qazaqstan biz úshin ekijaqty bailanystar turǵysynan da, integratsiialyq birlestikter men halyqaralyq uiymdar aiasynda da mańyzdy ári ýaqyt synynan ótken odaqtas, – Belarýs Prezidenti.
Qazaqstan Prezidenti kelissózder barysynda saýda-ekonomikalyq saladaǵy ózara is-qimyldy damytýǵa erekshe mán berilgenin atap ótti.
Memleket basshysy BAQ ókilderine biylǵy 9 aida elderimiz arasyndaǵy taýar ainalymynyń kólemi 60 paiyzdan astamǵa artyp, 441 million AQSh dollaryn quraǵanyn aitty.
Sonymen qatar, Nursultan Nazarbaev eki el úkimetteri eýraziialyq integratsiia áleýetin eskerip, ózara saýda-sattyq jasaý barysynda paidalanylmaǵan rezervterdi tartýdy jandandyrý qajet ekenin atap ótti.
– Men bizdiń saýda nomenklatýramyzdy keńeitý baǵytynda jumys isteýdi usyndym. Ónerkásip kooperatsiiasyn nyǵaitýǵa jáne ekijaqty saýda-sattyq kólemin arttyrýdyń naqty derekterine airyqsha mán berildi, – dedi Qazaqstan Prezidenti.
Memleket basshysy kombain, traktor, sondai-aq karerlik, júkti ózi aýdaratyn, tirkemeli jáne basqa da tehnikalar shyǵarý jónindegi birlesken kásiporyndar qyzmetiniń tiimdiligin arttyrý qajettigine erekshe toqtaldy.
Nursultan Nazarbaev eki eldiń geografiialyq turǵydan utymdy ornalasqanyn aityp, kólik-tranzittik ózara is-qimyldyń zor múmkindikteri bar ekenine nazar aýdardy, sondai-aq onyń aiasyn keńeitý oryndy ekenin atap ótti.
– Sońǵy alty jyl ishinde Qazaqstan men Belarýs arqyly tasymaldanatyn Qytai men Eýropa arasyndaǵy júk kólemi 100 esege jýyq artty. 2018 jyly bul kólem eki ese ósedi dep kútilýde. Biz osy saladaǵy Astana men Minskiniń yntymaqtastyǵy jónindegi odan ári is-qimyldaryn belgiledik, – dedi Qazaqstan Prezidenti.
Belarýs Prezidenti IT-tehnologiialar salasyndaǵy eki el yntymaqtastyǵynyń perspektivaly ekenin aitty.
– Bul sapar ekijaqty yntymaqtastyqtyń jańa kezeńin bastady. Innovatsiialar men joǵary tehnologiialarǵa mán bere otyryp, ózara kapital salý onyń basty ereksheligi bolyp tabylady, – dedi Aleksandr Lýkashenko.
Sońynda Nursultan Nazarbaev ótken kelissózder barlyq aýqymdy ózara is-qimyl boiynsha Qazaqstan men Belarýs arasyndaǵy yntymaqtastyqtyń damýyna tyń serpin beretinine senim bildirdi.
