«Ekspoǵa» kelińder, qandastarym,
Toidyń toiǵa tileńder jalǵasqanyn!
Shaqyrady senderdi Qazaqstan,
Án kernegen ár kúni tańǵy aspanyn!
Shaqyrady senderdi Uly Dalań,
Baq darydy, qut qonyp búgin oǵan.
Kútip otyr senderdi qushaq jaiyp,
Jasyl jelek jamylǵan tunyq alań!
Shaqyrady senderdi Er Nurekem,
Táýekelge bailaǵan beldi bekem!
Qazaq qazaq bolǵaly dál osyndai,
Baǵy janǵan zamandy kórdi me eken?!
Qolyn alyp, sálem ber dana Atańa,
Alsyn appaq batasyn bala-shaǵa.
Astananyń aralap bar kóshesin,
«Jármeńkeni» erinbei tamashala!
Seni kútip tur búgin Dala myna,
Qut darysyn ár basqan qadamyńa!
Arý qyzdar, shashyńdy tarat kelip
Maida qońyr Arqanyń samalyna!!
Esilge kep tup-tunyq jý betińdi,
Qaldyr appaq aidynǵa sýretińdi!
Án men jyrǵa tańyrqat bar álemdi,
Uiyqtamastan jalǵap bir kúnge túndi!
Jurtyń daiyn qazaqtyń dalasynda ár,
Otanyńnan seniń de alasyń bar.
Kórgenderiń bólenip qýanyshqa,
Kórmegender, armanda qalasyńdar!
Saýyq quryp, deseń bir dem alaiyn,
Astanaǵa biyl jaz kel, aǵaiyn!
Ishem deseń, sar qymyz sapyrýly,
Jeiim deseń, jal-jaiań jáne daiyn!!
Uly toidan jaiyń joq bógeletin,
Qozdyr qońsy jurtyńnyń delebesin!
Ánin tyńdap Dimashtyń qarys jerden,
Qanatyńnyń kórip qait tóbelesin!
Otanyń bar Ordasy segiz qanat,
Toidyr kelip dúniege kózińdi abat!
Maqtanady Nurekem jer júzine,
Turǵyzdym dep irgesin ózim qalap!
Qazaǵyń bar dalasy keń kerilgen,
Qýat alǵan jel menen Jerge Kúnnen...
Qorjynyńdy qompaityp kel, týystar,
Ómir boiy bar jiǵan-tergenińmen!
Elbasyń bar keń iyq, qarys mańdai,
Aibatymen yqtyrǵan arystandai!
Tilep júrmin qandastar kelse eken dep,
Uly toidan osynaý qaǵys qalmai!
Táýekeldiń tosylmai min kemesin,
Otansyz el, bilesiń, múlde jetim!
At bailary qazaqtyń – Qazaqstan,
Jortyp-jortyp túbinde bir keletin!
Jatqamyz joq súrdekti qaita basyp,
Tyń álemnen jol taptyq taitalasyp.
Kelem degen qazaqqa basy bútin,
Uly Elińiniń qushaǵy aiqara ashyq!
Kelmeidi endi qatal qys, doly kóktem,
Kóz sal kelip Elimniń jolyna ótken.
Ainalanyń bul kúnde syry málim,
Mundai toidy jasaidy qoly jetken!
Joǵaltpaǵan halyqpyz ór minezin,
Qonaǵyna usynǵan tórdiń ózin.
Saryarqanyń tósine – Astanaǵa,
Aǵylatyn seniń de keldi keziń!
Boldy uqsasa qazaqqa shyn esimiń,
Páter bitken ashqaly tur esigin.
Tirshiliktiń bailanbai kúibeńine,
Ózgelerden buryn kel bir-eki kún!
Qaldy alysta zamandar jeli basym,
El tanyǵan saltyń bar berip asyn.
«Eksponyń» tartylǵan kermesine,
Birinshi bop bailansyn seniń atyń!
Bersin Esil máńgilik tunyq aǵa,
Kýá bolyp symbatyń, syryńa da...
Sendermenen kórikti Qazaqstan,
Sendermenen aibatty Uly Dala!
Aýyt Muqibek
31.03.2017
Astana
Abai.kz
