EKSPO qonaqtary Ońtústiktiń óniminen dám tatty
Elordadaǵy Ońtústik kúnderinde «EKSPO-2017» halyqaralyq kórmesin tamashalaýǵa kelgen qonaqtar qonaqjai kúngei jurtynyń erekshe syiyna kýá boldy. Iaǵni, bas qalanyń tórinde ońtústikqazaqstandyq ónertapqysh Erkinbek Bókebaev oilap tapqan «Qazaq Arbasy» eki danasy qoiylyp, onda ulttyq sýsyndarymyz – qymyz, qymyran jáne qurt, tústik aimaqtyń darhan dalasynda pisip jetilgen jemis-jidekter sharaǵa kelýshilerge tegin taratylyp, bir sát arqa-jarqa kúige endi.
Astanadaǵy «Báiterek» alańynyń mańynda uiymdastyrylǵan sharaǵa qala qonaqtary men sheteldik meimandar kóptep keldi. Alǵashynda tegin taratylǵan taǵamdarǵa tań qalǵan halaiyq, keiinnen Ońtústiktiń myrzalyǵyna tánti bolyp, alǵysyn bildirdi.
Is-sharany uiymdastyrýshylardyń aitýynsha, Ońtústiktiń Astanaǵa tartýy ármen qarai da, kúngeidiń teriskeidegi mádeni kúnderi aiaqtalǵansha jalǵasady.
Aita óteiik, Elbasy Nursultan Nazarbaev «Bolashaqqa baǵdar: rýhani jańǵyrý» baǵdarlamalyq maqalasynda ulttyq kodty saqtai bilý arqyly ulttyq sanany jańǵyrtý qajettigi jónindegi tapsyrmasyna orai, ońtústikqazaqstandyq ónertapqysh Erkinbek Bókebaev dástúrdi saqtap qalýdyń tyń úlgisi retinde qazaqtyń eski pishindegi arbasynyń ústine kiiz úidi qondyrǵan jyljymaly dúńgirshek - «Qazaq Arbasy»-syn oilap tapqan-dy. Bul arba qazaqtyń qymyz-qymyran sekildi ulttyq sýsyndaryn satýǵa arnalǵan.
OQO ákiminiń baspasóz qyzmeti
