Gala-kontserttiń ashylý saltanatynda sóz alǵan Ońtústik Qazaqstan oblysynyń ákimi J.Túimebaev barsha astanalyqtar men qonaqtardy Konstitýtsiia kúnimen quttyqtady.
Ońtústik ónerpazdarynyń kontsertine QR Premer-Ministriniń orynbasary E.Dosaev, Eńbek jáne halyqty áleýmettik qorǵaý ministri T.Dúisenova, Mádeniet jáne sport ministri A.Muhamediuly, Syrtqy ister ministri Q.Abdrahmanov, Joǵarǵy Sot Tóraǵasy Q.Mámi, «Samuryq-Qazyna» AQ basqarma tóraǵasy Ó.Shókeev, Astana qalasy ákiminiń orynbasary E.Amanshaev, QR Parlamenti Senatynyń depýtattary men Qazaqstandaǵy shetel elshileri jáne qoǵam qoǵam qairatkerleri qatysyp, búgingi keshtiń mártebeli meimandary boldy.
Óńirdiń ózindik kelbeti men ereksheligin, mádeni, rýhani bailyǵy men tarihi izgi qadamdaryn jurtshylyqqa nasihattaý maqsatyndaǵy aitýly sharaǵa oblystyń 1000-ǵa jýyq mádeniet jáne óner sheberleri qatysty.
Óner kóshiniń alǵy baspaldaǵy jergilikti ónerpazdardyń gala-kontsertimen bastalyp, Astanadaǵy mádeniet kúnderiniń shymyldyǵy túrildi. Kieli, tarihi mekenge bai kúngei ólkeniń sharasy «Qazyna», «Shamsinýr», «Tumar», «Shattyq» bi ansamblderi men balet toby, Sh.Qaldaiaqov atyndaǵy oblystyq filarmoniianyń ánshileriniń qatysýymen «Tirshiliktiń bastaýy - Qazyǵurt» sazdy-horeografiialyq kompozitsiiasynan bastaý aldy.
Elbasy N.Á.Nazarbaevtyń «Bolashaqqa baǵdar:Rýhani jańǵyrý» maqalasynda kórsetilgendei týǵan jerge degen súiispenshilikti arttyrý, Otan-ana men sarabdal saiasatty eldiń asqaq ómirin nasihattaýǵa maqsatynda dúniege kelgen N.Beiseqojaevtyń «Nurly jol» kúii Sh.Qaldaiaqov atyndaǵy oblystyq filarmoniianyń «Súgir» atyndaǵy ult-aspaptar orkestri, oblystyq opera jáne balet teatrynyń simfoniialyq orkestri, «Ońtústik-Tsirk» mekemesiniń «H-bend» estradalyq djaz ansambliniń oryndaýymen pash etilse, án padishasy Shámshi Qaldaiaqovtyń ánderinen quralǵan poppýri de óner súier kórermenge jol tartty. Halyq ánderi men dástúrli ánder jáne sopranolar men tenorlardyń sherýi respýblikalyq, halyqaralyq baiqaýlardyń jeńimpazdary atanǵan óner dúldilderiniń oryndaýymen B.Serdalynyń «Túrkistanym – Turanym» áni men «Qazyna» bi ansambli «Dala danalyǵy» bii rýhty kóterip, jigerdi oiatar leppen oryndaldy.
Gala-kontsert barysynda Ońtústik óńiriniń týmasy, QR Eńbek sińirgen qairatkeri ánshi Altynai Jorabaevanyń oryndaýyndaǵy «Elimniń júregi – Astana» áni aiasynda «Shamsinur», «Shattyq» bi ansamblderi ózindik ónerdiń úlgisin pash etti. Shara sońy «Máńgilik el úshin» sazdy-áýendi kompozitsiiasymen qorytyndylandy.
Budan bólek, 600 jas dombyrashy bir mezette Qurmanǵazynyń «Balbyraýyn» kúiin oryndap, dombyranyń kúmbirlegen úni kórermenderdi erekshe áserge bóledi.
OQO ákiminiń baspasóz qyzmeti
