EKSPO eldiń týrizm týraly túsinigin ózgertti me?
Sóz basyn saiasattanýshy Edýard Poletaev ashty.
«Men bilsem, qazir osy kórmege qatysty qorytyndy sheshim shyǵaryp jatqan sarapshylar bar. Buǵan áli de bolsa erte dep sanaimyn. «Balapandy kúzde sanaidy» degen sóz bar» dedi ol.
Al jýrnalist Vladislav Iýritsynniń aitýynsha, qazir kórmege qatysty pikirin qalyptastyryp úlgergen úsh top bar.
«Alǵashqylary: «Kórmeni kózimen kórmegender. Biraq osy sharaǵa shashylǵan aqshaǵa júregi aýyratyndar. Olar úshin bul qyrýar aqsha bosqa ketti. Jelge ushty. Qumǵa ushty. Al EKSPO-nyń qaitymy bolmaidy.
Keiingileri: Kórmeni kózimen kórgender. Kóńili tolǵandar. EKSPO-nyń beker ótkizilmegenine kózi jetkender. Ras, mundailar asa kóp emes.
Al úshinshi bir toby: Mádenietti súietinder. Astanaǵa kórmege kelgen elderdiń mádeni baǵdarlamasyn kórý úshin ǵana barǵandar qanshama. Olarǵa pavilondar qyzyq emes, sharaǵa shaqyrtý alǵan memleketterdiń mádeni baǵdarlamalary qyzyq» deidi ol.
Óz kezeginde web-baspager Jánibek Súleev: «EKSPO aiaqtalǵannan keiin qańyrap qalǵan pavilondardy qaitemiz? Olardy qai maqsatqa qoldanamyz? Olar erteńgi kúni bos qalmai ma?
Bul oraida meniń bir usynysym bar. Osy pavilondarǵa nelikten kýlinarlar men aspazdardy shaqyrmasqa? Olardy eki-úshi jyl boiyna salyqtan bosatyp kásibin damytýyna múmkindik bersek, ulttyq ashanamyz álemge jańa qyrynan tanylar edi ǵoi?» degen pikir bildirdi.
Al «Tsentr Aziia» jýrnaly bas redaktorynyń orynbasary Evgenii Pastýhovtyń sózinshe kórme týraly aitqanda týrizm máselesin nazardan shet qaldyrmaý kerek. «Týrizm týraly túsinik degen ne? Kóp adamdar týrizmdi kýrort jáne teńiz dep oilaidy. Boldy. Basqa eshteńe emes. Alaida týrizmniń shekarasy onymen shektelmeitini belgili ǵoi.
Aitalyq, qazirgi kúni murajailar men kórmelerge kim barady? Baratyndar bar, biraq, tym az. Sondyqtan da EKSPO arqyly eldiń týrizm týraly túsinigin ózgertýge kúsh salýymyz kerek.
Sosyn endigi jerde EKSPO-ǵa qansha aqsha jumsalǵany mańyzdy emes. Muny mádeniet, bilim jáne ǵylym salasyna jumsalǵan investitsiia dep túsingenimiz jón» dedi ol.
Al jiyndy túiindegen saiasattanýshy Anton Morozov kórmeni imidjine korrýptsiialyq daý kóleńke túsirgenin aitty.
«Taǵy bir másele, sizder EKSPO aiaqtalǵannan keiin ondaǵy nysandar qańyrap qalmai ma dep jatyrsyzdar. Menińshe suraqty basqasha qoiý kerek. Bul nysandar qashanǵa deiin shydaidy, olardyń irgetasy qanshalyqty sapaly, olardyń qabyrǵasy qanshalyqty berik? Ózderińiz bilesizder, qysta EKSPO-nyń bir konstrýtsiiasy qirap qaldy. Kúni keshe áleýmettik jelilerde kórmege arnap salynǵan nysandardyń áinegi shytynap jatqany týraly jazyldy. Sýretteri de salyndy. Buǵan ne deisizder?» dedi ol.
