ءسوز باسىن ساياساتتانۋشى ەدۋارد پولەتايەۆ اشتى.
«مەن بىلسەم، ءقازىر وسى كورمەگە قاتىستى قورىتىندى شەشىم شىعارىپ جاتقان ساراپشىلار بار. بۇعان ءالى دە بولسا ەرتە دەپ سانايمىن. «بالاپاندى كۇزدە سانايدى» دەگەن ءسوز بار» دەدى ول.
ال جۋرناليست ۆلاديسلاۆ ءيۋريسىننىڭ ايتۋىنشا، ءقازىر كورمەگە قاتىستى پىكىرىن قالىپتاستىرىپ ۇلگەرگەن ءۇش توپ بار.
«العاشقىلارى: «كورمەنى كوزىمەن كورمەگەندەر. ءبىراق وسى شاراعا شاشىلعان اقشاعا جۇرەگى اۋىراتىندار. ولار ءۇشىن بۇل قىرۋار اقشا بوسقا كەتتى. جەلگە ۇشتى. قۇمعا ۇشتى. ال ەكسپو-نىڭ قايتىمى بولمايدى.
كەيىنگىلەرى: كورمەنى كوزىمەن كورگەندەر. كوڭىلى تولعاندار. ەكسپو-نىڭ بەكەر وتكىزىلمەگەنىنە كوزى جەتكەندەر. راس، مۇندايلار اسا كوپ ەمەس.
ال ءۇشىنشى ءبىر توبى: مادەنيەتتى سۇيەتىندەر. استاناعا كورمەگە كەلگەن ەلدەردىڭ مادەني باعدارلاماسىن كورۋ ءۇشىن عانا بارعاندار قانشاما. ولارعا پاۆيلوندار قىزىق ەمەس، شاراعا شاقىرتۋ العان مەملەكەتتەردىڭ مادەني باعدارلامالارى قىزىق» دەيدى ول.
ءوز كەزەگىندە web-باسپاگەر جانىبەك سۇلەيەۆ: «ەكسپو اياقتالعاننان كەيىن قاڭىراپ قالعان پاۆيلونداردى قايتەمىز؟ ولاردى قاي ماقساتقا قولدانامىز؟ ولار ەرتەڭگى كۇنى بوس قالماي ما؟
بۇل ورايدا مەنىڭ ءبىر ۇسىنىسىم بار. وسى پاۆيلوندارعا نەلىكتەن كۋلينارلار مەن اسپازداردى شاقىرماسقا؟ ولاردى ەكى-ۇشى جىل بويىنا سالىقتان بوساتىپ كاسىبىن دامىتۋىنا مۇمكىندىك بەرسەك، ۇلتتىق اسحانامىز الەمگە جاڭا قىرىنان تانىلار ەدى عوي؟» دەگەن پىكىر ءبىلدىردى.
ال «سەنتر ازيا» جۋرنالى باس رەداكتورىنىڭ ورىنباسارى ەۆگەنيي پاستۋحوۆتىڭ سوزىنشە كورمە تۋرالى ايتقاندا تۋريزم ماسەلەسىن نازاردان شەت قالدىرماۋ كەرەك. «تۋريزم تۋرالى تۇسىنىك دەگەن نە؟ كوپ ادامدار ءتۋريزمدى كۋرورت جانە تەڭىز دەپ ويلايدى. بولدى. باسقا ەشتەڭە ەمەس. الايدا ءتۋريزمنىڭ شەكاراسى ونىمەن شەكتەلمەيتىنى بەلگىلى عوي.
ايتالىق، قازىرگى كۇنى مۇراجايلار مەن كورمەلەرگە كىم بارادى؟ باراتىندار بار، ءبىراق، تىم از. سوندىقتان دا ەكسپو ارقىلى ەلدىڭ تۋريزم تۋرالى تۇسىنىگىن وزگەرتۋگە كۇش سالۋىمىز كەرەك.
سوسىن ەندىگى جەردە ەكسپو-عا قانشا اقشا جۇمسالعانى ماڭىزدى ەمەس. مۇنى مادەنيەت، ءبىلىم جانە عىلىم سالاسىنا جۇمسالعان ينۆەستيسيا دەپ تۇسىنگەنىمىز ءجون» دەدى ول.
ال جيىندى تۇيىندەگەن ساياساتتانۋشى انتون موروزوۆ كورمەنى يميدجىنە كوررۋپسيالىق داۋ كولەڭكە تۇسىرگەنىن ايتتى.
«تاعى ءبىر ماسەلە، سىزدەر ەكسپو اياقتالعاننان كەيىن ونداعى نىساندار قاڭىراپ قالماي ما دەپ جاتىرسىزدار. مەنىڭشە سۇراقتى باسقاشا قويۋ كەرەك. بۇل نىساندار قاشانعا دەيىن شىدايدى، ولاردىڭ ىرگەتاسى قانشالىقتى ساپالى، ولاردىڭ قابىرعاسى قانشالىقتى بەرىك؟ وزدەرىڭىز بىلەسىزدەر، قىستا ەكسپو-نىڭ ءبىر كونسترۋسياسى قيراپ قالدى. كۇنى كەشە الەۋمەتتىك جەلىلەردە كورمەگە ارناپ سالىنعان نىسانداردىڭ اينەگى شىتىناپ جاتقانى تۋرالى جازىلدى. سۋرەتتەرى دە سالىندى. بۇعان نە دەيسىزدەر؟» دەدى ول.
