Onyń aitýynsha, qazirgi tańda dúniejúzilik mánge ie bolyp otyrǵan bul sala tek kórkem tabiǵatymen ǵana shektelmei, tarih pen arheologiialyq qazbalardyń, mádeniet pen órkeniettiń, sáýlet pen eskertkishterdiń tartymdylyǵymen erekshelenip otyr.
– Aita keterligi, ekotýrizm baǵytyn damytyp otyrǵan Aqsý-Jabaǵyly men Qarataý qoryqtary, Sairam-Ógem ulttyq parki jáne Syrdariia-Túrkistan óńirlik tabiǵi parki siiaqty memlekettik mekemelerdiń úlesi mol. Odan bólek, oblys aýmaǵynda erekshe qorǵalatyn tabiǵi aýmaqtarǵa jatqyzylǵan 1 zoologiialyq jáne 1 dendrologiialyq park, 16 memlekettik tabiǵi eskertkish bar. Sondai-aq, óńirde botanikalyq áralýandylyqty saqtaý maqsatyndaǵy 7 tabiǵi qaýmal uiymdastyrylǵan. Olar: Aqdala, Temir, Boraldai, Zadariia, Jambyl qaýmaldary, – dedi Qamytbek Qasymbekuly.
Qýanarlyǵy, oblystaǵy erekshe qorǵalatyn tabiǵi aýmaqtarǵa kelýshilerdiń legi jyl sanap ósip keledi. Máselen, 2014 jyly 18623 adam bolsa, 2017 jyly 25687 adam demalýǵa kelgen. Iaǵni demalýǵa kelgen týrister sany 3 jyl ishinde 40 paiyzǵa artqan.
«Ońtústik halqynyń, onyń ishinde Shymkent qalasy turǵyndarynyń eń kóp demalýǵa baratyn oryndary bolyp Sairam-Ógem ulttyq parkiniń Qasqasý, Sairamsý, Birkólik, Ógem, Mashat, Kókbulaq shatqaldary sanalady. Búginde «Altyn Dán», «Ekspert-Servis», «Qasqasý-Týr», «East West Company LTD» siiaqty demalys oryndary týristerge qyzmet kórsetýde jemisti eńbek etip keledi», – dedi Qamytbek Jorabaev.
Oblystaǵy erekshe qorǵalatyn tabiǵi aýmaqtarda ósimdikterdiń 1800-den astam túri bar. Sondai-aq, Qazaqstannyń Qyzyl kitabyna engen ósimdikterdiń 50-den astam túri ósse, sút qorekti janýarlardyń 41 túri, qustardyń 300-ge jýyq túri meken etedi.
