22 qarasha kúni “Bogatyr Kómir” kenishinde óndiristik jumystardy oryndaý kezinde elektroslesar qaza tapty, dep habarlaidy Dalanews.kz.
Kásiporyn ókilderiniń málimdeýinshe, oqiǵanyń naqty sebepterin anyqtaý úshin arnaiy komissiia qurylǵan.
“Bogatyr Kómir” JShS marqumnyń týystary men jaqyndaryna qaiǵyryp kóńil aitady”, — dep málimdedi olar.
Oblystyq Eńbek inspektsiiasy komitetiniń departamenti de bul jaǵdai boiynsha tergep-tekserý júrgizip jatqanyn habarlady.
Aldyn ala derekterge súiensek, elektroslesar jumys istep jatqan nysanǵa elektr qýaty merziminen buryn berilgen. Qaýipsizdik talaptarynyń buzylýy saldarynan qyzmetker oqiǵa ornynda qaza tapqan.
Aita keteiik, 1994 jyly týǵan jas qyzmetker týǵan kúnine nebári úsh kún qalǵanda ajal qushty.
