Ekibastuz qalasynda bir jarym jastaǵy balanyń ólimine bailanysty qozǵalǵan qylmystyq is toqtatyldy. Sábi 2025 jyldyń jeltoqsan aiynda kóz jumǵan, dep habarlaidy Dalanews.kz "Almaty.tv"-ǵa silteme jasap.
Dárigerler balany stomatit diagnozymen emdegen, alaida qaiǵyly jaǵdaiǵa birneshe saǵat qalǵanda aýyr ekijaqty pnevmoniia anyqtalǵan. QR Densaýlyq saqtaý ministrligine qarasty Meditsinalyq jáne farmatsevtikalyq baqylaý komitetiniń Pavlodar oblysy boiynsha departamenti júrgizgen tekseris barysynda balaǵa ýaqytynda rentgen jasalmaǵany jáne qan taldaýy alynbaǵany belgili boldy.
Alaida soǵan qaramastan, meditsina qyzmetkerleri qylmystyq emes, tek ákimshilik jaýapkershilikke tartylyp, aiyppul salynǵan.
"Ekibastuz qalalyq aýrýhanasy men Ekibastuz qalasyndaǵy №1 emhananyń meditsina qyzmetkerleriniń áreketterinen Qylmystyq kodekstiń 317-baby 3-bóliginde kózdelgen qylmystyq quqyqbuzýshylyq quramy belgileri joq. Atap aitqanda, bul - meditsina qyzmetkerleriniń kásibi mindetterin salǵyrt nemese adal oryndamaýy saldarynan abaisyzda adam ólimine ákep soqqan jaǵdai", - dep habarlady qalalyq prokýratýra.
Osy qorytyndyǵa súiene otyryp, sotqa deiingi tergep-tekserý toqtatylǵan. Balanyń anasy Valentina Hamitova istiń jabylǵanyn birneshe kúnnen keiin ǵana bilgenin aityp otyr. Onyń sózinshe, joldaǵan ótinishteri qaralmaǵan.
«Maǵan 3 aqpanda ǵana istiń jabylǵany týraly habarlady. Buǵan deiin ótinish joldaǵan edik, biraq ony eshkim qaramaǵan. Telefon arqyly habarlasqanymda ǵana istiń toqtatylǵanyn bildim. Bul qalai?» – deidi ol.
Qazirgi ýaqytta anasy isti qaita qozǵaýdy, qosymsha saraptama taǵaiyndaýdy jáne balany emdegen barlyq dárigerlerden jaýap alýdy talap etip otyr.
