Qabyldaýda Eńbekshiqazaq aýdanynan kelgen Azangúl Álbosyn oblys ákiminen mal sharýashylyǵyn damytý úshin jer telimin berýdi surady. Kásipker alǵashqy sharýasyn eki bas túie ósirýden bastaǵan. Búginde onyń 50-ge jýyq túiesi bar. Bir aita keterligi, kásipker et-sút baǵytyndaǵy mal sharýashylyǵyn damytýmen qatar týǵan aýylynda qazaqtyń ulttyq órnegi bar ydystaryn jasaý úshin qolóner sheberligin úiretýge daiyn.
– Kópbalaly analarǵa qolóner buiymdaryn jasap, tabys tabýy úshin qoldaý kórsetkim keledi. Shikizat bar, jumys isteýge negiz bar, biraq bul kásipti bastaý úshin maǵan qoldaý kerek. Ideiany júzege asyrsaq, kóptegen áielder tabysqa keneledi. Onyń ústine tutynýshylar tarapynan suranys ta joǵary, – dedi kásipker.
Marat Sultanǵaziev óz kezeginde kásipkerdiń ideiasy aýyldarda shaǵyn jáne orta biznesti damytý jónindegi tapsyrmasymen úndesip jatqanyn, bul baǵytta aýdan ákimine tiisti tapsyrma berilip, jobaǵa qoldaý kórsetiletini basa aityldy.
Oblys ákimi tanymal kásipker Sydyq Dáýletovtiń sharýa qojalyǵy da bir túiemen bastalǵanyn eske saldy. Aita keteiik, mal sharýashylyǵynyń bul salasy sýbsidiialanbaidy. Soǵan qaramastan ol sharýashylyq ónimderin shetelderge eksporttaityn deńgeige deiin jetkizgen. Azangúl Álbosyn da sharýa qojalyǵyn eki túieden elýge deiin ulǵaitty. Sharýa qojalyǵyna jer telimi bólinse, kásipker odan ári mal basyn kóbeitip qana qoimai, qosymsha jumys oryndaryn ashpaq niette.
Túie júni ejelden jylý saqtaityn ereksheligimen jáne emdik qasietterimen baǵaly. Sondyqtan, túie júninen jasalǵan ónimge suranys joǵary. Oblys ákimi, osylaisha, kásippen ainalysqysy keletin aýyl áielderine qoldaý kórsetý kerektigin atap ótti.
Oblys ákimi shara sheńberinde barlyǵy 6 adamdy qabyldady. Qabyldaýda kóterilgen barlyq máseleler sheshimin taýyp, olardyń oryndalýy oblys ákimi apparatynyń baqylaýyna tapsyryldy.
