Taiaýda FB-daǵy belsendilerdiń biri úiine áldebirýlerdiń tegin jazýymen kún qurǵaitpai kelip turatyn «Egemen Qazaqstandy» qamyr jaiǵanda astyna tósenish, jańbyr jaýǵanda balshyq súrtetin «trápki» retinde paidalanatynyn aitypty. Budan basqa «Jas Alashty» aialap, kútip ustaityndaryn da (meniń buǵan kúdigimi bar) jazypty.
Iá, «Egemen Qazaqstan» resmi gazet, elimizdiń bas gazeti. Mundai gazet barlyq elderde bar. Biraq bizdiń keibir oqyrmandar siiaqty ózge eldiń azamattary «osy bir gazetpen balshyq súrtemiz» dep áleýmettik jelilerge oilanbai post jazbaidy. Jazǵan kúnde de maqtap, madaqtap jazatyny anyq. Al «talǵampaz» oqyrmanymyz «Jas Alashty» shyǵaryp otyrǵan Rysbek Sársenbaidyń sol Egemennen túlep ushqanyn bilmeitini anyq. Bilse, bulai demes edi. Eń soraqysy, osy posttyń astyna biraz adam gazetti qalaisha mailyqqa ainaldyrǵandaryn jarysa jazǵany qynjyltty. Gazetti mailyq qylǵandy maqtangershilik kórip, ony kópshilikke aitý uiat jaǵdai. Bul adamnyń oi-órisi plitýstyń deńgeiimen shamalas ekenin ańǵartsa kerek.
Sodan keiin qazaq gazetterine jazylyp, shyǵyndanǵan 3-4 myń teńgeni aityp jylai berýdi qoiatyn kez jetti. Qaita, ákimshiliktiń aiǵai-súreńinsiz qazaq gazetterine jazylýdy dástúrge ainaldyrǵan jón. «Egemen», «Jas Alash», «Aiqyn», «Túrkistan», «Ana tili», «Almaty aqshamy», «Jas qazaq», «Qazaq úni», bári-bári, qazaqtyń joǵyn joqtap, muńyn muńdaityn basylymdar. Táýelsizdik jyldary qazaq tili úshin kúresti osy gazetter júrgizdi. Tilderdi damytý agenttigi tildiń múddesin qorǵaýda osy gazettiń birindei eńbek sińire alǵan joq. Táýelsizdigimizdi nyǵaitty. Alash arystaryn aqtap, jaryqqa shyǵaryp, halyqqa tanystyrǵan da osy gazetter. Áldekimder balshyq súrtýge paidalanatyn «Egemenniń» tigindisin paraqtaǵan adam osy saryndas myńdaǵan maqalany tabaryna bás tigemin.
Qurmetti oqyrman, qazaq gazetine jazylý úshin jumsaǵan aqshańyzdy qazaq tili men ulttyq saiasattyń qazyǵyn qaǵýǵa qosqan úlesińiz dep bilińiz!
Nurlan JUMAHAN.
