Qytaıdaǵy «Singer» baıqaýynda erekshe ónerimen álemge tanymal bolǵan qazaqstandyq ánshi Dımash Qudaıbergen gollıvýdtyq «Power Rangers» fılminiń saýndtregin oryndady, dep habarlaıdy QazAqparat.
Bul týraly Qytaıdaǵy dıstrıbútorlyq kompanıa Weibo áleýmettik paraqshasynda habarlap, kartınanyń 10 sekýndtyq treıleri men foto-afıshasyn júktedi.

Weibo-daǵy aqparattarǵa qaraǵanda, fılmdi jarnamalaý maqsatynda arnaıy túsirilgen klıpte Dımash «Go Go Power Rangers» ánin oryndady. «Power Rangers» amerıkanyń Lions Gate Entertainment jáne Qytaıdyń TIK Films kompanıalary birlesip túsirgen sýperbatyrlar janryndaǵy kıno.

24 naýryz kúni Amerıkada jáne Taıvanda tanystyrylymy ótti. Qytaıda prokatqa sáýir aıynyń basynda shyǵady dep kútilýde.   Eske sala keteıik, Qytaıda erekshe tanymaldylyqqa qol jetkizgen qazaqstandyq jas talant Dımash Qudaıbergen keshe Shańhaı qalasynda ótken 24-kezekti «China Top music Awards» sharasynda «Azıanyń eń tanymal ánshisi» (Best Asia popularsinger) nomınasıasy boıynsha marapattalǵan bolatyn.

 

https://www.youtube.com/watch?v=JKWU_kGf7KY