Ónerimen álemdi tańdai qaqtyrǵan Dimash ai saiyn emes, apta saiyn mýzyka shyńyn baǵyndyryp, júldeniń túr-túrine qol jetkizdi. Jaqynda eki birdei marapatqa ie boldy. Onyń biri «jyldyń úzdik tanymal ánshisi», al ekinshisi «sheberligi úshin» (Za dinamichnoe masterstvo) tabystalǵan. Dálirek aitsaq,
Dimash 1 jyldyń ishinde bas-aiaǵy 20-dan astam ataqqa ie bolypty.
Jaqynda Dimashtyń ózi kóp kútken álemdik týrnesi bastaldy. Alǵashqy kontsertin Chansha qalasynan bastaýy tegin emes eken. Sebebi, Dimashty tanymal etken «Men ánshimin» jobasy dál osy qalada ótken bolatyn. Búgin taǵy bir kontserti Qytaidyń Fýdjoý qalasynda ótip jatyr. Dimashtyń anasynyń aitýynsha, álemdik týrnesi bir jyl boiy jalǵaspaq.
«10 myń adamnan asatyn kórermenniń aldynda Dimash óte úlken abyroimen ótkizdi. Biz oǵan ózimiz kýá boldyq», – deidi Dimashtyń anasy Sveta Aitpaeva.
Dimashtyń alǵashqy kontsertine ata-anasy jáne tanymal ánshi Ulyqpan Joldasov jarymen baryp qaitqan. Keshten alǵan áserin anasy sózben aityp jetkize almaimyn deidi.
«Kontsert tolyǵymen orkestrdiń súiemeldeýimen ótti. Fonogramma esh nárse qoldanylmaidy. Kásibi sheberligi myqty úlken toppen jumys jasaidy», – deidi Dimashtyń anasy.
Dimashtyń álemdik deńgeidegi týrnesine sheteldiń myqty degen mýzykanttary arnaiy shaqyrylǵan. Oǵan Japoniia, Amerika, Resei, Qytaidyń Gonkong qalasynyń kásibi mamandary jinalǵan. Tek mýzykanttar ǵana emes, Dimashty sándi kiindiretin stilister de gollivýd juldyzdarynyń talǵamynan shyqqan mamandar kórinedi.
«Ledi Gaganyń, Maikl Djeksonnyń jeke stilisti bolǵan maman óz komandasymen ushyp kelip, Dimashtyń kontsertine kostiýmderin jinady», – deidi Sveta Aitpaeva.
Dimash repertýaryn tek ózi ǵana tańdaityn kórinedi. Oryndaityn ánderin dosy ári án árleýshi Erlan Bekchýrin men atyraýlyq kásibi mýzykant Baýyrjan Aqtaev óńdep ǵalamtor arqyly ánshige jiberip otyrady eken.
Jaqynda ánshi Dimash álemniń eń symbatty 100 jigitiniń qataryna endi. Ánshiniń tanymal bolǵany sonshalyqty amerikalyq ataqty akter Bred Pitt pen Dýein Djonsonnyń ózin artta qaldyryp,
tizimniń 76 orynyna taban tiregen. Osylaisha, jahandy moiyndatqan Dimash búginde týǵan elin saǵynyp júr eken.
«Elin saǵynady. Saǵynsa kelip turady. Biraq, ol qazir jas sondyqtan jumys isteý kerek. Jaqynda eline kelip ketedi», – deidi Dimashtyń anasy Sveta Aitpaeva.
