Tanymal ánshi Dimash Qudaibergenniń anasy Sveta Aitbaeva otbasyndaǵy qýanyshty jańalyǵyn bólisti. Ol Instagram paraqshasynda uly Mansurdyń Kúlásh Baiseiitova atyndaǵy Qazaq ulttyq óner ýniversitetiniń kolledjin aiaqtaǵanyn jazdy, dep habarlaidy dalanews.kz.
Sveta Aitbaevanyń sózinshe, Mansurdyń bul jetistigine búkil otbasy qýanyp jatyr. Ol ulyna aq tilegin arnap, óz isiniń sheberi bolýyn tiledi.
"Mansurtaiym Kúlásh Baiseiitova atyndaǵy Qazaq ulttyq óner ýniversitetiniń kolledjin aiaqtap, bárimiz qýanyp jatyrmyz. Qutty bolsyn, botaqanym! Óz isińniń sheberi bol", – dep jazdy ol.
Sondai-aq ánshiniń anasy Mansurdyń osy kúnge deiin Dimashtyń janynda júrip, álemdik sahnalarda óner kórsetkenin, túrli sheberlik sabaqtarynan ótkenin atap ótti. Onyń aitýynsha, Mansur myqty mýzykanttarmen birlese jumys istep, alǵashqy týyndylaryn jazyp, birneshe mýzykalyq aspapty meńgergen.
Sveta Aitbaeva ulyna bilim berip, óner jolynda baǵyt kórsetken ustazdaryna da alǵys bildirdi. Ol gitarany sheber meńgertken Álibi Iýsýfulyna, Pavel Aleksandrovichke jáne kýratory Raýshan Rahembaiqyzyna rizashylyǵyn jetkizdi.
"Baqytty bol, eń bastysy ǵumyrly bol, botam", – dep túiindedi Sveta Aitbaeva.
Aita keteiik, Mansur Qudaibergen – Dimash Qudaibergenniń inisi. Ol bala kezinen mýzykaǵa jaqyn bolyp, shyǵarmashylyq ortada ósip keledi. Mansur aǵasy Dimashtyń birqatar kontsertteri men saparlarynda janynan tabylyp, sahna mádenietin erte kórgen. Jas mýzykant birneshe aspapty meńgerip, óz týyndylaryn jazýǵa da qadam basqan. Jeli qoldanýshylary onyń ónerdegi alǵashqy jetistikterine jyly lebiz bildirip, bolashaǵyna sáttilik tiledi.
