Májilis depýtaty Erbolat Satybaldy elde qoldan jasalǵan ataq-dańq berý sánge ainalǵanyn málimdedi, dep habarlaidy Dalanews.kz.
Depýtattyń aitýynsha, "bir jaǵynda jyltyraqqa, arzan ataqqa, maqtangershilikke áýes azamattar, ekinshi jaǵynda sol "marapatty" taratyp júrgen qoǵam belsendileri, betke ustar azamattar, tipti óner, qoǵam qairatkerleri".
"Másele jeke adamdarda emes, másele osylai júiege ainalyp bara jatqanynda. Keibir pysyqailar "Altyn adam", "Ǵasyr adamy" atty entsiklopediia shyǵaryp, 300 myń teńge tóleseń, ózińdi de, ata-babańdy da "altyn adamdar" qaýymyna qosyp beretin boldy. "Qazaqstannyń qurmetti azamaty", "Ult ustazy", "Ǵasyr ustazy", "Qazaqstannyń qairatkeri", "Alash uly", "Uly Dala uly", "Arda azamat", "Tulǵa" tize berseń, shegi joq jalǵan tósbelgi men ordender. Bul - ataqtyń, abyroidyń, tarihtyń ashyq saýdasy. Al mundaidy uiymdastyryp júrgender - qoǵamdaǵy qundylyqtardy joiyp jatqan qaskóiler", - dedi ol.
Depýtat 2025 jyly 25 jeltoqsanda Qazaqstan ardagerleri qoǵamdyq birlestigi birneshe azamatty Baýyrjan Momyshuly atyndaǵy "Namys", "Batyr shapaǵaty", "El janashyry" sekildi belgilermen marapattaǵanyn, keiin bul belginiń ataýy, syrt kelbeti memlekettik nagradaǵa uqsas dep tanylyp, uiymdastyrýshynyń birine Ákimshilik quqyqbuzýshylyq týraly kodekstiń 674-baby 2-bóligi boiynsha aiyppul salynǵanyn aitty.
Erbolat Satybaldy qazirgi zańda "qoǵamdyq marapat" uǵymy naqty aiqyndalmaǵanyn, saldarynan qoǵamdyq birlestik, qaýymdastyq jáne ózge uiymdar taǵaiyndaityn marapat arnaiy quqyqtyq retteýden tys qalyp otyrǵanyn málimdedi.
"Qoǵamdyq marapattarda tarihi tulǵalardyń esimin jáne "Qurmetti", "Eńbek sińirgen", "Dańq", "Batyr", "Namys" siiaqty mártebeli ataýdy qoldaný jii kezdesedi", - dep túiindedi ol.
