Depýtat Dáýlet Muqaev Májilis otyrysynda kvadroberler máselesin kóterdi, - dep habarlaidy Dalanews.kz.
"Kvadroberler degenimiz kim? Qarapaiym tilde aitsam, olar adam bolýdan bas tartyp, kúndelikti ómirde ózderin janýarlarǵa teńep, tórt aiaqtap júrip, janýar keipindegi betperdemen júredi. Itshe, mysyqsha ómir keship, solardy dybystaidy. Máshhúrshe aitqanda, "Ataiyn deseń - ań emes, soiaiyn deseń - mal emestiń" dál ózi", - dedi ol.
Dáýlet Muqaev kvadroberlerge qatysty jantúrshigerlik derekter kórshi elderde tirkelip jatqanyn jetkizdi.
"Olar tek syrtqy keiip ózgertip qoimai, itterge tán áreketter jasap, adamdarǵa shabýyldaý, iaǵni tyrnaý, tisteý faktileri de kezdesken. Dál bul oqiǵalar kórshi Resei jáne Ózbekstan elderinde tirkelip úlgerdi. Bul, bul ma?! Áleýmettik jelilerde kvadrober bolýdy úiretetin arnaiy toptar, jabyq arnalar paida bolyp, arnaiy sabaqtar da uiymdastyryp jatyr. Bul bir qaraǵanda balalyq qylyq dep qabyldaǵanmen, balalardyń psihologiiasy men áleýmettik damýyna keri áserin tigizip, shekten shyǵyp barady", - deidi ol.
Depýtat batys elderindegi jaǵdai múldem kúrdeli ekenin, balalar sabaqta sóileýden bas tartyp, janýarsha dybystaýdy shyǵarǵanyn aitty.
"Bul sýbmádeniet ókilderine arnap arnaiy keshter uiymdastyrylatyn bolǵan. Sonymen qatar kvadrober bolýǵa qajet zattardy satý jańa biznes kózine ainalyp, internette joǵary baǵada satylyp jatyr. Eń qorqynyshtysy - balalar bul oiynnan psihologiialyq zardap shegip, adam bolýdan qalady. Adamdyq problemalardan qashyp, janýar bolýǵa áýestenedi. Biz bul máseleniń aldyn almasaq, bildei bir urpaqtan aiyrylý aldynda turmyz. Bala boiyna adamdyq qundylyq uialatýdyń ornyna, keri ketý protsesi alǵa shyqty.
Álem elderi dabyl qaǵyp, balalarǵa erekshe kóńil bólýge shaqyryp jatyr. ...Búginde Reseide bul másele boiynsha zań qabyldaý talqylansa, ózbek halqy ata-anaǵa mindetterin durys oryndamaǵany úshin aiyppul salý máselesi qolǵa alynǵan", - dedi ol.
Dáýlet Muqaev quzyrly organdardan bul máseleni jan-jaqty zerttep, aldyn alý boiynsha sharalar qabyldaýdy surady.
