Onyń sózinshe, aityp kelmeitin apat bolǵan soń, onyń ústine adam shyǵyny qaýpi bolǵandyqtan, árkez daiyn bolǵan jón.
"Almatylyqtar jer silkinisi týraly habarlama almady. Turǵyndar basynda ábigerge tústi. Boiyn úrei bilegen halyq japatarmaǵai syrtqa umtyldy. Tipti kópqabatty úilerdiń terezesinen sekirýge deiin bardy. Kólikterimen qala syrtyna shyǵyp ketpek bolǵandarda esep joq. Onyń sońy uzynsonar kepteliske ulasty. Bul – elimizdiń eń úlken qalasy, jan-jaqty damyǵan, infraqurylymy myqty Almatydaǵy jaǵdai", - deidi depýtat.
Sonymen qatar, Baqytjan Bazarbek alda da qaýip bolýy múmkin ekenin eskertti.
"Abyroi bolǵanda, ǵimarattar qulamady, adam shyǵyny joq. Dese de, mundai jaǵdaidyń qaitalanbasyna kim kepil?! Ásirese, elimizdiń taýly aimaqtarynda, jerasty qazynany óndirip jatqan óndiristi óńirlerde zilzala qaýpi joǵary. Sondyqtan, Tótenshe jaǵdai ministrligi men basqa da tiisti mekemelerdiń zilzaladan qorǵaný boiynsha jumystaryn muqiiat qaita qaraǵan jón.
Feik aqparattarǵa sengish halyqty qorqynysh biledi. Barlyq jaǵdai da ótirik aqparat tez tarap ketetini bar. Azamattar tek resmi aqparatty ala bilýi qajet, árbir taraǵan materialdy jan-jaqty tekserýimiz kerek. Sol úshin bizde apatqa daiyn bolatyndai mádeniet qalyptasýy tiis", - dedi ol.
Sýret: Baqytjan Bazarbek/facebook.com
