Onyń pikirinshe, ulttyq etnikalyq tóltýma mádeniettiń shyraqshysy – qazaqtyń qasietti qara dombyrasy. Ókinishke qarai, búgingi qoǵam arasynda, áleýmettik jelilerde halqymyzdyń arda bolmysyn ardaqtaityn dombyra aspabyna degen shabýyldar, jas urpaqtyń sanasyn teris uǵymdarǵa itermeleitin qaýipti de ulttyq dúnietanymymyzǵa jat pikirler kóbeiip barady.
Ásirese, dini jat aǵymdardyń jeteginde ketken keibir Qazaqstan azamattary jurtty adastyratyn teris pikirler taratyp jatyr. Buǵan áleýmettik jelide jeldei esip júrgen «Dombyra – haram» degen sekildi adam shoshytar alypqashpa sózder dálel, – dedi ol premer-ministrdiń orynbasary Tamara Dúisenovaǵa, Bas prokýror Berik Asylovqa joldaǵan depýtattyq saýalynda.
Depýtat dombyra tatýlyq pen birliktiń mámilegeri ekenin, ulttyq aspap nebir alasapyran eldi biriktirýge zor ról atqarǵanyn atap ótti.
Keshegi 32-jyldardyń ashtyǵynda da ata-babalarymyz bileginen ál ketip, ózegi talyp, aqtyq demi shyqqansha qolynan dombyrasyn tastamaǵan. «Qazaq – naǵyz qazaq emes, Naǵyz qazaq – dombyra» dep Qadyr aqyn aitpaqshy, Dombyra aspaby – qazaq degen sózdiń sinonimi, ult degen uǵymnyń mazmunyn ashatyn mánge ie. Sebebi halqymyzdyń arman-muraty, ulttyq tálim-tárbiesi, tóltýma mádenieti, dúnietanymy osy qasietti dombyra arqyly kórinis tabady.
Endeshe, dombyraǵa tiisý – ultqa til tigizý, tóltýma mádenietimizdi qorlaý, ótken tarihymyz ben búginimizge kóleńke túsirý dep qabyldaimyz. Qasietti dombyraǵa til tigizýge, qorlaýǵa jol bermeiik, armen de, zańmen de qorǵai bileiik, tyiym salaiyq, – dedi ol.
Depýtat máseleni sheshý úshin mynadai usynys aitty:
Prezidenttiń «Mektepke dombyra úiretý sabaqtaryn engizý – qajetti ári durys bastama» degen sózin Oqý-aǵartý ministrligi eskerýsiz, aiaqsyz tastamaýǵa tiis. Bilim beretin orta mektepterde án-kúi sabaǵynda dombyra aspabyn úiretý oqý baǵdarlamasyna engizilsin. Oqytý protsesine mýzykalyq joǵarǵy jáne arnaýly bilimi bar bilikti mamandar tartylsyn;
BAQ-ta, radio jáne telearnalarda dombyra aspabynyń qundylyǵyn ashatyn án-kúi, jyr-terme, aitys ónerleri kóbirek nasihattalsyn;
Din isteri jónindegi basqarma teris aǵym jeteginde ketken adamdarmen jumys júrgizýdi kúsheitýge tiis.
