Joǵary sottyń sot alqasy májilis depýtaty Dáýlet Turlyhanovtyń uly Bolat Nurasyldyń isine qatysty úkimdi qaita qaraýǵa negiz tapty, dep habarlaidy Dalanews.kz.
Bul málimdemeni advokat Anna Chernova jetkizdi.
“Mańyzdy kezeń ótkerildi. Biz sottyń sheshimin kútemiz jáne ádil jaza taǵaiyndaidy dep úmittenemiz. Eske sala keteiin, ol – osy bap boiynsha aiyppul arqalaǵan jalǵyz adam. Tipti eń tómengi deńgeiden az. 500 AEK ǵana. Buzaqylyq nietpen eki adamnyń densaýlyǵyna ortasha aýyrlyqtaǵy ziian keltirgen adamǵa 1,7 million teńge aiyppul salynbaýy kerek! Elimizde adam ómiri men densaýlyǵyna qol suǵylmaý kerek”, – deidi zańger.
Onyń aitýynsha, sot aldynda bári teń.
“Biz siiaqty qarapaiym halyq pen bedeldi memlekettik qyzmetker-depýtattyń balasy arasyndaǵy is, meniń oiymsha, áleýmettik teńdik ornatýdyń bastapqy núktesi bolýy kerek.
Kezinde raqymshylyqqa ilinip, keiin áieli Saltanat Núkenovany óltirdi dep aiyptalǵan eks-ministrdiń oqiǵasy qaitalanbaýy kerek. Jazadan jaltarý jańa qylmystarǵa jol ashýy múmkin. Bári zań aldynda birdei. Ádildik kútemiz”, – deidi ol.
Eske salaiyq, buǵan deiin QR eńbegi sińgen jattyqtyrýshy Dáýlet Turlyhanovtyń uly Almatyda óz súiiktisi men eki zańgerdi soqqy astyna alǵany týraly aqparat taraǵan edi.
Belgili bolǵandai, boijetkenge arasha túspek bolǵan advokattar da taiaq jep qalǵan. Bul jaǵdai Qazaqstan Respýblikasynyń Qylmystyq kodeksi 293 "Buzaqylyq" baby boiynsha tirkeldi.
Al bul oqiǵaǵa qatysty pikir bildirgen Dáýlet Turlyhanov bolǵan jaitty rastap, ulynyń kámeletke tolǵanyn jáne barlyq áreketke ózi jaýapty ekenin jetkizgen bolatyn. Sonymen qatar sheshimdi quqyq qorǵaý organdary qabyldaidy dep kesip aitqan edi.
