Densaýlyq saqtaý ministrligi BAQ pen áleýmettik jelilerde jariialanǵan patsientterdiń jaǵdaiyna qatysty shaǵymdardan keiin Respýblikalyq mamandandyrylǵan psihiatriialyq aýrýhanaǵa keshendi tekserý júrgizetin boldy, dep habarlaidy dalanews.kz.
Ministrliktiń málimetinshe, sońǵy ýaqytta mekemedegi naýqastardy ustaý jaǵdaiyna qatysty birqatar jariialanym taraǵan. Osyǵan bailanysty Densaýlyq saqtaý ministri Meditsinalyq jáne farmatsevtikalyq baqylaý komitetine aýrýhana qyzmetin jan-jaqty tekserýdi tapsyrǵan.
Tekserý barysynda mamandar meditsinalyq qujattamany, emdeý protsesiniń uiymdastyrylýyn, patsientterdiń ustalatyn jaǵdaiyn, laýazymdy tulǵalardyń áreketin jáne em qabyldap jatqan azamattardyń quqyqtarynyń saqtalýyn baǵalaidy.
Ministrlik málimetinshe, tekserý jumystaryna óz quzyreti aiasynda prokýratýra men Adam quqyqtary jónindegi ýákil apparaty da tartylady.
Vedomstvo tekserý qorytyndysy boiynsha barlyq derekke obektivti baǵa beriletinin atap ótti. Eger zańbuzýshylyqtar anyqtalsa, kináli tulǵalarǵa qatysty zańnamaǵa sáikes tiisti sharalar qabyldanady.
Ministrliktiń málimetinshe, bul – Qazaqstandaǵy osyndai beiindegi jalǵyz mamandandyrylǵan meditsinalyq mekeme. Munda sot sheshimimen májbúrli meditsinalyq em taǵaiyndalǵan patsientter em qabyldaidy.
Sondai-aq aýrýhanada erekshe emdeý-qorǵaý rejimi qoldanylady. Ol patsientterdiń, meditsina qyzmetkerleriniń jáne qoǵamnyń qaýipsizdigin qamtamasyz ete otyryp, emdeý men ońaltýǵa qajetti jaǵdai jasaýǵa baǵyttalǵan. Vedomstvonyń dereginshe, bul mekemede emdelip jatqan patsientterdiń 80 paiyzdan astamy buryn adamǵa qarsy aýyr jáne asa aýyr qylmys jasaǵan.
