Dáýlet Turlyhanovqa qandaı kompanıalar tıesili ekeni belgili boldy, - dep habarlaıdy Dalanews.kz.
Bul týraly jýrnalıs Dmıtrıı Shıshkın habarlady. Dáýlet Turlyhanov tek sport pen memlekettik qyzmette ǵana emes, kásip salasynda da tabysty adam. Qazirgi tańda ol avtokólikterdi óndirýmen jáne satýmen aınalysatyn úsh komersıalyq kompanıanyń quryltaıshylarynyń biri.
Mysaly "Gazavto Kazahstan" JSHS salyqty eń kóp tólep otyrǵan kompanıa. Mekeme 2015 jyldan beri 12,7 mıllıard teńge salyq tólegen.
Sonymen qatar, Dáýlet Turlyhanov "Vıraj-Holdıng" JSHS quryltaıshysynyń biri.
Turlyhanovtyń tabysty kásipteriniń biri - Semeıde ornalasqan "SemAZ" kompanıasy. JSHS aýylsharýashylyǵyna arnalǵan tehnıka daıyndaýmen aınalysady. Kompanıa saıtyndaǵy málimet boıynsha, zaýytta qytaılyq, japonıalyq jáne koreıalyq avtobýstar, belarýs traktorlary men qytaılyq júk kólikteri daıyndalady. Kompanıa 2015 jyldan beri 10 mıllıard teńgedeı salyq tólegen.
Sondaı-aq Dáýlet Turlyhanov "BelAvto" JSHS kompanıasynyń da ıesi. Kompanıa avtokólik quraldarynyń bólshek saýdasymen aınalysady.
Odan bólek, depýtattyń komersıalyq qyzmet kórsetýmen aınalysatyn jeke kásibi bar.
Memlekettik kirister departamentiniń málimetinshe,Dáýlet Turlyhanov birneshe qalada ornalasqan úıleriniń salyǵyn tóleıdi. Depýtattyń Aqmola oblysy, Semeı qalasy, Kókshetaý, Astana jáne Almatydaǵy eki aýdanda úıleri bar.
