«Dastan» tushparasyna suranys joǵary
Mine, Shý aýdanynda da shaǵyn jáne orta biznesti belsendi qoldaý baǵytyndaǵy jumystar búgin de jalǵasyn taýyp, byltyraýdan tarihynda alǵash ret Kóktóbe aýylynan tushpara shyǵaratyn jańa tseh ashylypty. «Dastan» dep atalatyn tseh búginde táýligine 50 kelige deiin tushpara daiyndaidy. Kóktóbe aýylynyń turǵyny Berik Ormanbekovtyń «Ormanbekov» jeke kásipkerligi mundaǵy ónimdi tek siyr etinen ázirleidi eken. Qazirgi tańda Shý aýdanyndaǵy dúken sórelerinen «Dastan» ataýyndaǵy tushpara ónimin jii kezdestirýge bolady. Turǵyndardyń aitýynsha, ótimdi taýar tárizdi, sórelerde kóp turaqtamaityn kórinedi. Óitkeni, atalmysh tsehtyń ónimin tek kóktóbelikter ǵana emes, aýdannan shalǵai ornalasqan Shoqpar, Dalaqainar sekildi aýyldyq okrýgtiń turǵyndary da kóptep tutynady eken.
– Kóbine-kóp basqa jaqtan kelgen taǵamdardyń quramyna kúdikpen qaraitynymyz jasyryn emes. Oǵan qosa, Shý aýdany oblysymyzdaǵy eń úlken aýdandardyń qataryna kiredi. Sondyqtan, ónimniń ótimdiligi de joǵary bolmaq. Osyndai jaittardyń bárin oilastyra kele, tushpara tsehyn ashýdy josparlap, endi mine óz kúshimizben mejeli maqsatymyzǵa da qol jetkizip otyrmyz. Bizdiń ónimderimiz búgingi tańda «Dastan» ataýymen aýdandaǵy Shý qalasy men barlyq aýyldyq okrýgterdegi dúkenderde satylýda. Oilaǵanymyzdai-aq,ónimge degen suranys óte joǵary boldy.
Ázirge tsehta alty adam jumys isteidi. Olardyń barlyǵy da jergilikti jerdiń turǵyndary. Sátin salyp, memleket tarapynan qoldaý bolyp jatsa, óndiriske qajetti qosymsha qurylǵylar alyp, tsehtyń óndiristik qýatyn ulǵaitýdy kózdep otyrmyz, - deidi Berik Rysqulbekuly.
