Densaýlyq saqtaý qyzmetkerlerine shabýyl jasaǵandarǵa qylmystyq jaýapkershilik engizilýi múmkin, dep habarlaidy Dalanews.kz.
Meditsinalyq qyzmetkerlerge qyzmet barysynda jasalǵan shabýyl úshin qylmystyq jaýapkershilik engizý usynylyp otyr. Bul týraly Densaýlyq saqtaý ministri Aqmaral Álnazarova úkimet otyrysyndaǵy brifingte málimdedi.
– Biz bul baǵytta birqatar usynystar engizdik. Olar qazirgi ýaqytta pysyqtalyp jatyr. Bas prokýratýra, Ádilet ministrligi jáne Ishki ister ministrligi tarapynan qoldaý tapty. Usynys – meditsina qyzmetkerlerine olardyń kásibi mindetin atqarý kezinde jasalǵan shabýyldar úshin qylmystyq jaýapkershilik belgileý týraly, – dedi ministr.
Sonymen qatar, Álnazarovanyń aitýynsha, aldaǵy ýaqytta meditsina qyzmetkerleri beinetirkegish jeton taǵyp júrýge mindettelýi múmkin. Bul qurylǵylar dárigerlerdiń jumysyn beinejazbaǵa túsirip, yqtimal quqyqbuzýshylyqtardy tirkeýge múmkindik beredi.
Aita keteiik, Ishki ister ministrliginiń dereginshe, 2023 jyly elimizde meditsina qyzmetkerlerine jasalǵan shabýyl boiynsha 60-tan astam oqiǵa tirkelgen. Onyń ishinde jedel járdem qyzmetine qatysty 30-ǵa jýyq fakti bar. Bul – tek politsiiaǵa aryz túsken jaǵdailar ǵana. Al beiresmi derekterde mundai oqiǵalar sany áldeqaida kóp bolýy múmkin ekeni aitylady.
Shabýyldardyń kóbi iri qalalarda – Almaty, Shymkent jáne Astana qalalarynda tirkelgen. Sebep – jedel járdemniń keshigýi, mas kúidegi azamattardyń agressiiasy, meditsinalyq kómekti durys túsinbeý nemese aýrýdyń shyn mánindegi aýyrlyǵyn baǵalamaý.
Qaraǵandydaǵy oqiǵa
2024 jyldyń qańtar aiynda Qaraǵandy qalasynda jedel járdem júrgizýshisine shabýyl jasaldy. Oqiǵa 26 qańtar kúni keshki saǵat 23:30 shamasynda oryn alǵan. Jedel járdem brigadasy joǵary temperatýramen aýyrǵan balaǵa kómek kórsetý úshin shaqyrtýǵa barǵan. Kólik úidiń aýlasynda toqtaǵan sátte, belgisiz er adam júrgizýshige shabýyl jasap, aýyr dene jaraqatyn salǵan.
Shabýyl saldarynan júrgizýshi bas súiek-mi jaraqatyn alyp, muryn súiegi men qabyrǵalary synǵan, sondai-aq kóz aimaǵynda gematoma paida bolǵan. Zardap shekken azamat Maqajanov atyndaǵy oblystyq aýrýhananyń nevrologiia bólimshesine jatqyzyldy.
Qylmys jasaǵan kúdikti 36 jastaǵy Nurbolat Dákebaev bolyp shyqty. Ol oqiǵa ornynan qashyp ketkenimen, keiinirek ustalyp, politsiiaǵa jetkizildi. Qaraǵandy qalasynyń soty ony kináli dep taýyp, bir jylǵa bas bostandyǵyn shekteý jazasyn taǵaiyndady.
Bul oqiǵa qoǵamda úlken rezonans týdyrdy. Densaýlyq saqtaý ministri Ajar Ǵiniiat bul jaǵdaidy jeke baqylaýyna alyp, meditsina qyzmetkerlerine jasalǵan kez kelgen shabýyldyń zań aiasynda qatań jazalanýy kerektigin málimdedi.
