Búginde Danial Ahmetov Alakóldiń Shyǵys Qazaqstan aýmaǵyndaǵy jaǵalaýynda týrizmdi damytý máselesin jeke baqylaýynda ustap otyrǵany belgili. Bul jaiynda gazetimizdiń 21 shildedegi sanynda («QmD» №27 /136/) «Danial Ahmetov – Alakóldi týrizmniń ortalyǵyna ainaldyrdy» dep jazǵan bolatynbyz. Oblys basshysy jurtshylyqpen kezdesýinde Alakól jaǵasynda týrizmdi damytýǵa barynsha qoldaý kórsetetinin taǵy da nyqtap aitty:
– Bizder biyl Alakól jaǵasynda týrizmdi damytý maqsatynda 2 mlrd. teńge bólip, onyń 550 mln. teńgesine jaǵajaidy abattandyrý isine jumsadyq. Atqarylǵan jumystyń nátijesine kóz súisinedi. Aldaǵy ýaqytta da bul baǵyttaǵy jumystar júieli túrde jalǵasyn tabatyn bolady, – dedi ákim.
Jumys sapary barysynda aýdandaǵy kásipkerlermen kezdesken Danial Ahmetov Alakól jaǵasynda saýda nysanyn zaman talabyna sai jańǵyrtýdyń eki joly bar ekenin aitty. Birinshisi – oblys qazynasynan Alakóldiń jaǵasyna túrli nysandardy salyp, ony kásipkerlerge jalǵa berý bolsa, ekinshisi – kásipkerlerdiń kól jaǵasyndaǵy infraqurylymdy damytýǵa investitsiia salyp, jaǵajaidy abattandyrýǵa at salysýy kerek ekenin aitty.
Oblys basshysy aldaǵy jyly jergilikti turǵyndar «arbat» dep atap ketken saiabaqty 500 metrge deiin ulǵaiatynyn jáne Alakól jaǵasynda demalýǵa niettengen shyǵysqazaqstandyqtarǵa arnap áýetasymalynda jeńildik jasaýdy qarastyryp jatqanyn da alǵa tartty. Budan basqa «Óskemen-Shar-Jalańashkól» baǵytyndaǵy temir jol qatynasyn jandandyrý máselesi qyzý talqylanyp jatqanyn kópshilikke jetkizdi.
Burynǵy jabaiy saýda oryndarynyń ornyn zaman talabyna sai saýda pavilondary men baǵasy qol jetimdi sáýletti meiramhanalar boi kótergen. Osy jumystardyń bári aýdan turǵyndarynyń keler kúnge senimmen qaraýyna negiz bolýda. Búginde týrizm Úrjar aýdanynyń negizgi kiris kózine ainalyp keledi. Jańa jumys oryndary ashylyp, halyqtyń turmysy jyl ótken saiyn jaqsarýda.
Óz kezeginde Danial Ahmetov Qazaqstannyń restoratorlar qaýymdastyǵynyń ókilderine Alakól jaǵasynda eýropalyq tiptegi jazǵy meiramhanalardyń jobasyn daiyndaýdy tapsyrdy.
– Demalýshylar kól jaǵasyndaǵy árbir nysanǵa kirgende sapaly qyzmetke ie bolyp, demalyp júrgenin barynsha sezinýi kerek. Bul úshin ózge elderdiń tirizmdi damytýdaǵy is-tájiribesin pysyqtap, paidalanýdyń mańyzy zor, – dedi oblys basshysy.
Iá, qazirgi tańda Alakól jaǵasy adam tanymastai ózgerýde. Buryǵydai júiesiz qurylystar joq. Demalys keshenderiniń ainalasy jasyl jelekke bólenip, kózdiń jaýyn alatyn jaryqtar tartylǵan. Jańadan boi kótergen avtobeket, jańa avtoturaqtar demalýshylarǵa sapaly qyzmet kórsetýde. Osy aýqymdy jumystardyń nátijesinde jyl ótken saiyn Alakóldiń Shyǵys Qazaqstan oblysy aýmaǵynda demalýshylardyń sany artyp keledi. Josparlaǵan jumystar júieli júretin bolsa, aldaǵy 2-3 kóleminde shetelge baratyn týristerdiń basym bóligi Alakóldi betke alady dep nyq senimmen aitýǵa bolady.
Nurlan JUMAHAN
