Olimpiada chempiony, qazaqstandyq boksshy Daniiar Eleýsinov mas kúiinde kólik júrgizip, jol apatyna túsken oqiǵadan keiin alǵash ret ishimdikke táýeldiligi týraly málimdeme jasady. Sportshy bul máselemen kúresip jatqanyn aityp, qoǵamdy mundai jaǵdaidy mazaq etpeýge shaqyrdy, dep habarlaidy dalanews.kz.
Daniiar Eleýsinov Instagram paraqshasynda videoúndeý jariialap, sońǵy ýaqytta ózine baǵyttalǵan syn-pikirlerge jaýap berdi.
Boksshy Olimpiadadan keiin alkogolge áýestene bastaǵanyn jasyrmai, bul máseleniń onyń ómirindegi kúrdeli synaqtardyń birine ainalǵanyn aitty.
«Iá, men ony moiyndaimyn. Olimpiadadan keiin alkogolge táýeldilik paida boldy. Onyń qalai bastalǵanyn ózim de naqty túsindire almaimyn. Bul kúletin nárse emes. Basynan ótpegen adam ony túsinbeýi múmkin. Jas kezimde men de mundai jaǵdailarǵa jeńil qaraitynmyn. Biraq ómirde árkim túrli synaqqa tap bolady. Qazir men osy máselemen kúresip jatyrmyn», – dedi sportshy.
Eleýsinov adamdardy ózgeniń qiyn jaǵdaiyn keleke etpeýge shaqyryp, kez kelgen adamnyń ómirinde aýyr kezeńder bolýy múmkin ekenin atap ótti.
Eske salaiyq, shilde aiynda Daniiar Eleýsinov Astanada mas kúiinde kólik basqarǵany úshin jaýapqa tartylǵan bolatyn. Politsiia málimetinshe, Toyota avtokóligin júrgizgen sportshy bir sapar barysynda birneshe jol-kólik oqiǵasyna sebepker bolǵan.
Keiin sot sheshimimen boksshy 20 táýlikke ákimshilik qamaýǵa alynyp, jeti jyl merzimge kólik júrgizý quqyǵynan aiyryldy. Sportshy 29 shildede bostandyqqa shyqty.
