Ákimderdiń halyqpen 19,8 myńǵa jýyq kezdesýi ótkizildi. 33,4 myńnan astam (99%) másele kóterilip, usynystar aityldy.
Premer-Ministr suraqtar negizinen turǵyn úi-kommýnaldyq sharýashylyq, qurylys, aýyl sharýashylyǵy jáne jer qatynastary, sondai-aq baǵa máselesine qatysty ekenin atap ótti.
«Olardyń basym bóligi ministrlerdiń halyqpen kezdesýlerinde jergilikti atqarýshy organdardyń qatysýymen sol jerde sheshildi. Al qalǵan máseleler memlekettik organdardyń Is-qimyl josparlaryna engizildi», — dedi Álihan Smaiylov.
Úkimet basshysynyń aitýynsha, olardyń keibirine zańnamalyq ózgerister, qosymsha qarjylandyrý nemese basqa vedomstvolardyń sheshimderi qajet. Sondyqtan Is-qimyl josparlaryna engizilgen problemalyq máselelerdi ýaqytyly sheshýdi qamtamasyz etý kerek.
Sonymen qatar Álihan Smaiylov birqatar ministrlikterdiń basshylary kezdesýlerdi aldyn ala habardar ete otyryp, sapaly uiymdastyryp, qorytyndysy boiynsha arnaiy brifingter ótkizgenin aitty. Al, keibir ministrlik basshylary josparlanǵan 15 kezdesýdi ótkizgen joq.
– Bul jerde qandai da bir syltaý aitý orynsyz. Eshqandai sebep qabyldanbaidy. Barlyq kezdesýler ótkizilýi tiis. Oǵan vitse-ministrlerdi de tartý qajet. Bul azamattardy kóbirek qabyldaýǵa múmkindik beredi. Bizge ashyq jáne naqty bailanys qajet. Halyq únine qulaq asatyn memleket úshin mundai is-sharalar halyqpen qarym-qatynastyń mańyzdy quralyna ainalýǵa tiis, – dedi ol.
Premer-Ministrdiń aitýynsha, búginde ákimderdiń kezdesýleri jańa formatta ótkiziledi. Bul qatysýshylar sanyn aitarlyqtai arttyryp, kóp máseleni sheshýge múmkindik beredi. Esepterge qarasaq, ákimdermen kezdesýlerde problemalardyń shamamen 99%-y sheshimin tabady. Bul oraida, Aqtóbe, Qostanai oblystary men Almaty qalasyndaǵy oń tájiribeni atap ótýge bolady. Al, Almaty, Batys Qazaqstan jáne Atyraý oblystarynda turǵyndardyń problemasyn sheshý kórsetkishteri tómen.
Sondai-aq Álihan Smaiylov «e-Ótinish» aqparattyq júiesine kelip túsetin azamattardyń aryzdaryna qaraityn bolsaq, basqasha jaǵdai qalyptasyp otyrǵanyn atap ótti. 2022 jyly osy júie arqyly 1,7 mln-nan astam adam ótinish berdi jáne qaraldy. Onyń 82%-y jergilikti atqarýshy organdarǵa tiesili.
– Sondyqtan ákimdikter jergilikti jerlerde máselelerdi sheshýdiń tiimdiligin arttyrýy qajet. Sonda elektrondy júie arqyly aryzdardyń azaiǵanyn kóremiz, – dedi Álihan Smaiylov.
