Áielin uryp óltirdi dep aiyptalyp, sotty bolǵan eks-ministr Qýandyq Bishimbaevtyń áýleti de qazaq qoǵamyna jaqsy tanymal. Tarihshylardyń sózine sensek, onyń atasy kezinde laýazymdy qyzmet atqarǵan, - dep habarlaidy Dalanews.kz.
Degenmen tarihshy Sultan Han Aqquly ótken úshin búgingi urpaq jaýap berýi mindetti emes degen pikirde.
"Atasynyń istegen qylmysy úshin nege nemeresi jaýap berýi kerek? Qýandyq Bishimbaevtyń soty bolyp jatqanda onyń týǵan atasy 12 qazaqty bir uiǵyrdy soqty degen aiyppen Itjekkenge aidatyp jibergen (degen aqparat shyqty - esk.). Oǵan Qýandyqtyń qandai qatysy bar?! Áitpese Qýandyqty áielin uryp óltiretin qylyp atasy tárbielep pe? Ol - tarih. Ótken zaman úshin búgingi urpaq, nemeresi, shópshegi jaýap berýge mindetti emes. Álihannyń 13 jyly jazǵan maqalasynda "Tarih ne úshin kerek? Tarihtan qai jerden súrindik, qai jerde quladyq, qai jerden gúldendik, sony bilýimiz kerek" deidi ǵoi. Tarih sol úshin ǵana kerek. Ǵalym retinde tarihty ainadai kórsetýimiz kerek. Bireýdi aqtaý, bireýdi qaralaý mindeti (aldymyzda - esk.) turmaýy kerek", - dedi tarihshy Sultan Han Aqquly "Qasqa jolǵa".
Aita keteiik, buǵan deiin áleýmettik jelide "Qýandyq Bishimbaevtyń ájesiniń esimi kóshege berilgen" degen aqparat tarap ketken edi. Dalanews.kz oblys ákimdiginiń baspasóz qyzmetine júgingende, rasynda da, Túrkistan oblysynda Mariia Bishimbaeva atyndaǵy kóshe bar bolyp shyqty. Degenmen bir niýans bar.
"Bishimbaeva Máriiam - Tólebi aýdanynyń Qurmetti azamaty. Aýdanǵa eńbegi sińgeni úshin Tólebi aýdany, Leńgir qalasyndaǵy burynǵy ataýy Sadovaia kóshesi Leńgir qalasy ákimdiginiń 2001 jylǵy 6 shildedegi №215 sheshimimen Mariia Bishimbaeva kóshesi bolyp qaita ataldy", - dep jazylǵan edi jaýapta.
Degenmen bul esimniń áielin óltirdi dep aiyptalyp otyrǵan Qýandyq Bishimbaevqa eshqandai qatysy joq bolyp shyqty.
"Mariia Bishimbaeva - oblys, aýdannyń damýyna úlken úles qosqan, birneshe jyl Qazyǵurt aýyldyq keńesiń basqarǵan, elge eńbegi sińgen azamat", - dep jaýap berdi ákimdiktegiler.
