Bıshimbaevtyń ákesi ýnıversıtet ashqaly jatqany ras pa?

Saǵynysh Sardarova 03 sáý. 2025 12:36 2836

Áleýmettik jelide eks-mınıstr Qýandyq Bıshimbaevtyń ákesi Ýálıhan Bıshimbaev jeke joǵary oqý ornyn ashatyny týraly aqparat tarady. Bul jaıtqa Ǵylym jáne joǵary bilim mınıstrliginiń qoǵammen baılanys departamentiniń dırektory, baspasóz hatshysy Oljas Berkinbaev jaýap berdi, – dep habarlaıdy Dalanews.kz.

Áleýjelide taraǵan aqparat

Jelide taraǵan aqparatta Ýálıhan Bıshimbaev Tarazda "Bishimbayev University" ataýymen jeke joǵary oqý ornyn ashatyny aıtylady.

"Ýnıversıtet talapkerlerdi qabyldaýdy jańa oqý jylynan bastaıdy jáne azamattyq, qylmystyq, halyqaralyq, korporatıvtik, qarjylyq jáne salyq quqyǵy, zıatkerlik menshik jáne tórelik sıaqty zań pánderine mamandandyrylady. Jelide jarıalanǵan málimetterge sáıkes, ýnıversıtet rektory Ýálıhan Bıshimbaevtyń ózi bolady", - dep jazylǵan aqparatta.

Mınıstrlik pikiri

Oljas Berkinbaevtyń aıtýynsha, zań boıynsha bul baǵytta zańdy tulǵalarǵa lısenzıa jáne (nemese) lısenzıaǵa qosymsha berý ǵylym jáne joǵary bilim salasyndaǵy ýákiletti organnyń quzyretine jatady.

"Joǵary jáne joǵary oqý ornynan keıingi bilim berý salasyndaǵy kez kelgen bilim berý qyzmeti mindetti túrde lısenzıalanady. Qazaqstan Respýblıkasynyń «Ruqsattar jáne habarlamalar týraly» zańyna sáıkes, ruqsat berý nemese habarlama tártibi belgilengen qyzmetti nemese áreketterdi (operasıalardy) jeke jáne zańdy tulǵalardyń tıisti ruqsat almaı nemese tıisti habarlamany jibermeı júzege asyrýyna jol berilmeıdi.

Joǵaryda aıtylǵandardy negizge ala otyryp, mınıstrlik «Bishimbayev University» ataýymen bilim berý qyzmetin júzege asyrýǵa lısenzıa berilgenin joqqa shyǵarady, sondaı-aq, «e-lısenzıalaý» aqparattyq júıesinde tıisti ótinim bolmaǵanyn habarlaıdy", - dedi mınıstrliktiń resmı ókili.