Áıelin óltirdi dep aıyptalyp otyrǵan eks-mınıstr Qýandyq Bıshimbaevqa qatysty búgingi sot otyrysynda eki aıyptalýshy - Bıshimbaev pen Baıjanov sońǵy sózderin aıtty, - dep habarlaıdy Dalanews.kz.
Kelesi sot otyrysy 10 mamyrǵa, saǵat 10:00-ge shegerildi.
"Kelesi sot otyrysynda alqabılerdiń qatysýymen sottyń sheshýine jatatyn suraqtardy talqylaý jáne tujyrymdaý ótedi. QPK-niń 653-babynyń 1-bóligine sáıkes suraqtardy talqylaý jáne tujyrymdaý ýaqytynda alqabıler sot otyrysy zalynan shyǵyp ketedi", - dep habarlady Joǵarǵy Sottyń baspasóz qyzmeti ókilderi.
Aıta keteıik, Astana qalasynyń mamandandyrylǵan aýdanaralyq sotynda Qýandyq Bıshimbaevqa qatysty qylmystyq is boıynsha birneshe sot otyrysy ótti. Ony dúıim jurt Joǵarǵy sottyń YouTube arnasynan onlaın qarady.
Azamattyq nekedegi áıeli Saltanat Núkenovany óltirdi degen aıyppen sottalyp jatqan eks-mınıstr Qýandyq Bıshimbaevty advokat Leıla Ramazanova, Nazken Qusaıynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aıtbek Amangeldi men onyń otbasynyń advokattary – Janna Orazbahova men Álıa Omarova.
27 naýryzda eks-mınıstr Qýandyq Bıshimbaevtyń isi boıynsha alqabıler tańdalǵan edi. Alqabıler alqasyna 12 adam irikteldi: 10 – negizgi quram, 2 – qosalqy. Sodan keıin ashyq sot otyrystary bastaldy.
Sonymen qatar, Qýandyq Bıshimbaev sotta Saltanat Núkenovany asa qatygezdikpen óltirgenin moıyndamady. Bul oqıǵa 2023 jyly 9 qarashada Astana qalasyndaǵy BAU meıramhanasynda boldy.
Bıshimbaevqa eki bap boıynsha aıyp taǵyldy:
- asa qatygezdikpen kisi óltirý (15 jyldan 20 jylǵa deıin nemese ómir boıyna bas bostandyǵynan aıyrý);
- qınaý (4 jyldan 7 jylǵa deıin bas bostandyǵyn shekteý nemese osy merzimge bas bostandyǵynan aıyrý).
