Memleket basshysy sot isin qashyqtan júrgizý azamattyq ister boiynsha aýmaqaralyq sottylyq júiesin engizýge múmkindik bergenin aitty, dep habarlaidy Dalanews.kz.
Sondai-aq osy tájiribeni ákimshilik isterde qoldanýdy kózdeitin zań jobasy depýtattardyń qaraýynda jatyr.
"Biyl sot otyrystary alǵash ret onlain kórsetile bastady. Osyndai tásilmen eki sot protsesi ótti. Sot isteri milliondaǵan adamnyń kóz aldynda meilinshe ashyq júrgizildi. Mundai qadam jurttyń sot júiesine senimin nyǵaita tústi deýge bolady. Bul – árine, buryn-sońdy bolmaǵan jańashyldyq. Sondyqtan sýdialar men aiyptaýshylarǵa qoiylatyn talap kúsheidi. Sotqa qatysýshy taraptar ashyq sot alańynda óz oilaryn erkin jetkize alady. Barlyq sot otyrysynda osyndai joǵary standart bolýy kerek. Sotty onlain ótkizýdiń taǵy bir utymdy tusy bar. Azamattardyń quqyqtyq sana-sezimi ózgerip keledi. Zańger mamandyǵyna degen qyzyǵýshylyq artty. Jastar zań salasyndaǵy mamandardy úlgi tuta bastady. Munyń bári qoǵamda kásibi maman bolý qundylyǵyn dáripteýge múmkindik beredi. Jalpy, sotty onlain ótkizý jurttyń quqyqtyq mádenietin kóterýge oń áser etýde. Bul – elimizde Zań men Tártip qaǵidatyn ornyqtyratyn tiimdi tásil,– dedi Memleket basshysy.
Qasym-Jomart Toqaev sot mamandaryn irikteý jáne quzyretin kúsheitýge basa mán berý qajet ekenin jetkizdi. Prezidenttiń aitýynsha, Joǵary sot keńesi derbes ári kásibi sýdialar korpýsyn qalyptastyrýdyń kepili bolýǵa tiis.
Jalpy, sýdialar adaldyqtyń, derbestiktiń jáne ádildiktiń jarqyn úlgisi bolýy kerek. Sondyqtan sýdialardyń etikalyq normalardy saqtaýy erekshe mańyzdy. Jańa ózgeristerge sai endi sot isin qaraý kezindegi barlyq óreskel qatelikti qazylar qaýymy tekseredi. Bul – sottardyń tártiptik jaýapkershiligin kúsheitýge baǵyttalǵan jańa tásil, – dedi Prezident.
Sóz sońynda Memleket basshysy sýdialardyń jańa Ádep kodeksin qabyldaýdy qoldady. Bul qujat sottardyń tártibinde joǵary standarttardy bekitip, sot júiesine qoǵamnyń senimin nyǵaita túsedi.
Eske salaiyq, biyl eki is boiynsha sot otyrystary ashyq, onlain rejimde ótti:
- Áieli Saltanat Núkenovany óltirdi dep sottalǵan eks-Ulttyq ekonomika ministri Qýandyq Bishimbaevtyń isi boiynsha;
- Jedel járdem qyzmetkerin soqqyǵa jyqty degen Nurbolat Dákebaevtyń soty.
