Jýyrda eks-ministr Qýandyq Bishimbaevqa qatysty sot otyrysyna reseilik tanymal jýrnalist Kseniia Sobchak keldi. Sot otyrysyna qatysty ol óz pikirin bildirdi, - dep habarlaidy Dalanews.kz.
Kseniia Sobchak Qazaqstanǵa jii keletinin, Qazaqstandy jaqsy kóretinin ári munda tanystary kóp ekenin aitady. Oǵan qosa is-sharalar men toilardy júrgizýge de shaqyrtýlar alady eken. Onyń sózinshe, qaishylyqty túsinikti buǵan deiin de baiqaǵan.
"Qazaq áielderiniń basym bóligi kósh ilgeri der edim: kóp jumys isteidi, órshil, azat, bárine óz kúshimen qol jetkizgisi keledi, emansipatsiiaǵa, táýelsizdikke, teńdikke umtylady. Onyń ústine munda durys feminizmge, ózara kómekke jáne girl power túsinigine oryn bar. Ondai áielderdi ózim de tanimyn, keibirimen dospyn, olardy qatty syilaimyn.
Alaida oǵan qosa bul elde "uiat" degen túsinik bar. Ol sózbe-sóz "styd" dep aýdarylady jáne qoǵamdyq aiyptaýdan kórinedi. Onlain da, oflain da. Osy qubylys boiynsha áiel kez kelgen dástúrli normadan aýytqyǵany úshin uiatqa qalýy múmkin. Kóshege qysqa beldemshemen shyqtyńyz ba? Uiat. Birneshe "ýhajeryńyz" bar ma? Uiat. Kúieýiń qol kóterip jatqanda, ketip qaldyń ba? Uiat. Árine, bul moraldyq zorlyq-zombylyqqa ushyraǵan áielderge qosymsha qysym jasaidy", - dedi ol.
Sonymen qatar, jýrnalist Saltanat Núkenovanyń isine qatysty pikir bildirdi.
"Saltanat isi betburys boldy, ol osy túsinikterdi ózgertip jatyr. Burynyraqta uiat degenniń áserinen konservativti oilaityn halyq áielderge "kóp sóileme, urys-keristi syrtqa jaima, úndeme, shyda, súiip ketesiń" dep kelgen. Endi mine qyzdar úidegi tirandarǵa qarsy kúreste birigip qana qoimai, arnaiy zańnyń qabyldanýyna da qol jetkizdi. Qazir Qazaqstanda Saltanat isi aiasynda óte qyzyq oqiǵalar bolyp jatyr. Múmkin tym-tyrys tóńkeristiń bir túrin kórip otyrǵan shyǵarmyz. Azamattyq qoǵamnyń jeńisin", - dep jazdy Sobchak.
Aita keteiik, 19 sáýirde Kseniia Sobchak YouTube-arnasynda Qazaqstanda turmystyq zorlyq-zombylyqqa qarsy qabyldanǵan zań týraly aitqan bolatyn. Sóz arasynda jýrnalist Bishimbaevqa qatysty is týraly da aita ketken bolatyn.
"Sotty kún saiyn júzdegen adam qarap otyr. Telegram arnalarda adamdar eki negizgi suraqty kóp qoiady: úkim qashan shyǵady jáne úkim qanshalyq ádil bolady? Degenmen "Ostorojno media" jýrnalisterine qazaqstandyq depýtattar zańnyń qabyldanýy Bishimbaev isine qatysy joǵyn aitty", - dedi Sobchak.
Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha sot otyrysy áli de jalǵasyp jatyr. Ony dúiim jurt Joǵarǵy sottyń YouTube kanalynan onlain tamashalap otyr.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Aliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Sondai-aq, onyń týysy Baqytjan Baijanov ta kúdikti retinde qamaýǵa alyndy. Oǵan qylmystyq kodekstiń eki baby boiynsha aiyp taǵylǵan. Naqtyraq aitsaq, 432-baby (asa aýyr qylmysty jasyryp qalý); 434-baby (asa aýyr qylmysty habarlamaý).
