Saltanat Núkenovanyń ólimine qatysty iste ekinshi aıyptalýshy bolǵan Baqytjan Baıjanovtyń advokaty Ǵazız Yntyqbaev sottalýshynyń atynan sot úkimine qarsy apelásıalyq shaǵym túsirdi, - dep habarlaıdy Dalanews.kz.
Baıjanovtyń advokatynyń sózinshe, apelásıalyq shaǵym sot keńsesi arqyly 27 mamyrda túsken. Advokat shaǵym túsirer aldynda Qylmystyq kodekstiń 432-baby ("Qylmysty jasyrý") boıynsha buryn sotta qaralǵan isterdi zerttegenin aıtty. Onyń sózinshe, sottalǵandarǵa bas bostandyǵynan aıyrýmen baılanysty emes jaza taǵaıyndalǵan.
"Ol tórt jylǵa bas bostandyǵynan aıyrylyp, eń qatań jaza aldy. Biz jazanyń mólsherimen ǵana emes, "Baıjanov kináli" degen úkimmen múldem kelispeımiz. Biz apelásıalyq shaǵymda naqty derekterdi keltiremiz, Baıjanovtyń is-áreketinde qylmystyq quqyqbuzýshylyq joq dep esepteımiz", - dedi Baıjanovtyń advokaty Ǵazız Yntyqbaev Tengrinews.kz-ke.
Baqytjan Baıjanovtyń advokatynyń aıtýynsha, qylmystyq is júrgizý kodeksine sáıkes apelásıalyq shaǵym eki aı ishinde qaralýy múmkin.
Aıta keteıik, Qýandyq Bıshimbaevtyń týysy Baqytjan Baıjanov sot úkimimen 4 jylǵa bas bostandyǵynan aıyryldy. Úkimdi sýdıa Aıjan Qulbaeva jarıalaǵan edi.
Baqytjan Baıjanov Qýandyq Bıshimbaev jasaǵan asa aýyr qylmysty ýádesiz jasyrý boıynsha kináli dep tanyldy (Qylmystyq kodekstiń 432-baby).
Sottalýshylardyń kinási jábirlenýshiniń, kýálardyń aıǵaqtarymen, aýdıo-beınematerıaldarmen, saraptamalyq qorytyndylarmen jáne qylmystyq istiń basqa materıaldarymen dáleldengen.
"Prokýror Bıshimbaevty 24 jylǵa, Baıjanovty 4 jylǵa bas bostandyǵynan aıyrýdy surady. Sot otyrysynda sottalýshylar óz kinálaryn moıyndamady. Sot Qylmystyq kodekstiń 53-babyna sáıkes sottalýshylar Bıshimbaev pen Baıjanov úshin kámeletke tolmaǵan balalary bolýyn jeńildetetin mán-jaılar dep tanydy", - dep jazylǵan sot málimetinde.
Aıyptaý qorytyndysyna sáıkes Baıjanovtyń qylmystyq jaýapkershiligi men jazasyn aýyrlatatyn mán-jaılar anyqtalmaǵan.
Jaza mólsheri týraly máseleni sýdıa men alqabıler Qylmystyq is júrgizý kodeksiniń 656-babyna sáıkes ashyq daýys berý arqyly kópshilik daýysty eskere otyryp sheshken.
Alǵashynda Baqytjan Baıjanov Qylmystyq kodekstiń eki baby boıynsha qylmys jasady dep aıyptaldy: 432-bap "aýa aýyr qylmysty jasyryp qalý" jáne 434-bap "asa aýyr qylmysty habarlamaý".
