Burynǵy ýaqyt beldeýine oralý týraly petitsiiaǵa 32,5 myńnan asa adam qol qoidy, - dep habarlaidy Dalanews.kz.
Eske salaiyq, 1 naýryzda 15 óńir UTC +5 ýaqyt beldeýine aýysyp, batys aimaqpen birdei bolǵan edi.
Bul jańashyldyq qoǵamda qyzý talqyǵa túsken edi. Petitsiia avtorynyń sózinshe, Qazaqstanda ýaqyt beldeýiniń aýysýyna bailanysty birneshe problema týyndap úlgergen.
«01.04.2024 jylǵy jaǵdai boiynsha, elektr energiiasyn tutyný úshin ortasha chek shamamen 17 000 teńge boldy. Demek ýaqyt beldeýiniń aýysýy shyǵyndy kóbeiteiin dep tur, ásirese kúz-qys mezgilinde. Qarańǵy kesh túsetindikten halyq jaryqty kóbirek qoldana bastaidy, al bul elektr energiiasyn tutynýdyń ósýine jáne sáikesinshe qosymsha shyǵyndarǵa ákeledi», - deidi petitsiia avtory.
Taǵy bir problema - adamdarda sharshaý basym bolyp, adamnyń ónimdi bola túsýi tómendep, adamnyń bioritmi men jumys, oqý jáne demalý kesteleriniń sáikes kelmeýi saldarynan uiqy sapasy nasharlap, turǵyndardyń fizikalyq jáne psihologiialyq turǵydaǵy jaisyzdyǵy kóbeie bastaidy. ⠀
«Memleketke mańyzdysy ne: kásipkerlerden memleket qazynasyna ruqsat etilmegen salyq arqyly túsetin aqsha ma, álde halyqtyń densaýlyǵy ma? Qazaqstan turǵyndary ýaqyt beldeýiniń aýysýynan bas tartýdy suraimyz», - deidi qazaqstandyqtar.
Bilik te «ýaqyt beldeýin aýystyrýda asyǵystyq tanytyp jibergen joqpyz ba?» dep oilana bastaǵandai. Saýda jáne integratsiia ministri Arman Shaqqaliev petitsiia qajet kólemdegi qol jinalǵannan keiin qarastyrylatynyn aitty.
