Buǵan deıin prezıdent Qasym-Jomart Toqaev respýblıkanyń egý ortalyqtarynda koronavırýsqa qarsy vaksınalardy saqtaýdyń temperatýralyq rejıminiń buzylýy týraly aıtqan bolatyn.
Sanıtarlyq komıtet basshysynyń aıtýynsha, jańa egý pýnktin iske qospas buryn birneshe kezeńdik tekserý júrgiziledi.
“Bizde egý pýnkterin qadaǵalaıtyn arnaıy toptar bar. Biz aqpan aıynda 200-den astam tekserýdi 200-den astam egý pýnktterinen bastaǵan bolatynbyz. Búginde elimizde 2000-nan astam egý pýnktteri bar. Vaksına salý pýnktteri ashylǵan kezde mindetti túrde ony aldyn ala tekseremiz”, – deıdi ol.
Sondaı-aq Esmaǵambetova vaksına pýnktterinde ekpe jumystaryn uıymdastyrýmen baılanysty buzýshylyqtar anyqtalǵanyn atap ótti. Temperatýralyq rejımdi saqtaý máselesi erekshe baqylaýda.
"Monıtorıńtik tekserýler júrgizilýde. Olardyń nátıjeleri boıynsha anyqtalǵan buzýshylyqtar vaksınanyń qaýipsizdigine áser etpeıtinin kórsetti. Buzýshylyqtar azamattardyń vaksına salýdy uıymdastyrýmen, olardy baqylaýymen jáne aldyn alý sharalaryn oryndaýmen baılanysty anyqtaldy. Búlingen vaksına azamattarǵa egilmeıdi. Arnaıy baqylaýdyń birneshe kezeńi bar", – dedi ol.
Buǵan deıin prezıdent Qasym-Jomart Toqaev Qazaqstannyń egý pýnktteriniń úshten biri koronavırýstyq ınfeksıaǵa qarsy vaksınalardy saqtaýdyń temperatýralyq rejımin buzǵanyn, bul onyń tıimdiligine áser etkenin málimdegen edi.
"Vaksınalardy tasymaldaý men saqtaýdyń barlyq aspektilerin naqty qarastyrǵan jón. Ókinishke qaraı, sońǵy derekter boıynsha barlyq óńirler bul jumysqa durys kóńil bólmegen. Vaksınalardy saqtaýdyń temperatýralyq rejımin buzýdyń kóptegen faktileri anyqtaldy. Mundaı jaǵdaı egý pýnktteriniń shamamen 30%-ynda bolǵan. Bul jaǵdaı vaksınanyń tıimdiliginiń tómendeýine sebep boldy", – dedi Toqaev.
