Búgin, 30 maýsymnan bastap, Reseı shetel azamattarynyń memlekettik shekara arqyly kirýi men shyǵýyna qatysty jańa erejeler boıynsha eksperımentti barlyq ótkizý beketterinde iske qosty, dep habarlaıdy Dalanews.kz.
Endi Reseıge vıza qajet emes elderdiń azamattaryna, sonyń ishinde qazaqstandyqtarǵa, elge kirmeı turyp aldyn ala Biryńǵaı sáıkestendirý jáne aýtentıfıkasıa júıesinde tirkeýden ótý jáne ruID mobıldi qosymshasy arqyly elektrondy túrde kiretindigi týraly ótinim berý usynylady.
«ruID qosymshasy arqyly Reseı Federasıasyna kirý týraly ótinimdi toltyrý – erikti sıpatqa ıe ekenin eskertemiz», – dep habarlaǵan bolatyn buǵan deıin Reseıdiń Qazaqstandaǵy elshiligi.
Kirý týraly ótinimdi toltyrmaý shekaralyq baqylaýdan ótýge kedergi keltirmeıdi. Alaıda Qazaqstan azamattaryna ruID qosymshasyn paıdalanýǵa keńes beriledi, sebebi ol Reseı aýmaǵynda birqatar qosymsha múmkindikterge jol ashady:
- qoljetimdi memlekettik qyzmetterdi onlaın alý;
- reseılik SIM-karta rásimdeý;
- aıyppuldardy, salyq bereshekterin jáne memlekettik alymdardy tóleý.
Jańa erejelerge saı, kirý týraly ótinim aldyn ala – saparǵa keminde 72 saǵat buryn jáne 90 kúnnen erte emes merzimde berilýi tıis.
Shuǵyl jaǵdaılarda – mysaly, týystyń aýyryp qalýy nemese qaıtys bolýy sekildi erekshe mán-jaılar týyndasa, ótinimdi 4 saǵat ishinde rásimdeýge bolady. Ol úshin erekshe jaǵdaıdy rastaıtyn qujattar usynylýy kerek.
