Bolat Nazarbaevtyń senimdi ókili degen atpen tanymal Eldos Qospaev bastaǵan uiymdasqan qylmystyq top múshelerine qatysty tergeý aiaqtaldy, - dep habarlaidy Dalanews.kz.
Endi Qospaev pen onyń uiymdasqan qylmystyq tobyna múshe adamdardyń isi sotqa túsedi. Bul týraly Qarjy monitoringi agenttigi tóraǵasynyń orynbasary Jeńis Elemesov málimdegen bolatyn. Elemesovtiń aitýynsha, isti tergeý aiaqtalyp, taraptar tanysyp jatyr.
"Ol boiynsha (Qospaev UQT - esk.) is aiaqtaldy. Qazirgi ýaqytta tanysyp jatyr. Tanysý aiaqtalǵannan keiin is sotqa jiberiledi", - dedi AFM tóraǵasynyń orynbasary.
Buǵan deiin Ulttyq qaýipsizdik komiteti bylaiǵy ortada Bolat Nazarbaevtyń senimdi ókili sanalyp kelgen Eldos Qospaev bastaǵan qylmystyq toptyń 7 múshesin Soltústik Kiprden Qazaqstanǵa jetkizgenin málimdegen edi. Bul operatsiia byltyr 6 qyrkúiekte júzege asyryldy.
Bul topqa QR Qarjylyq monitoringi agenttigi reiderlik jasady, uiymdasqan qylmystyq top qurdy jáne oǵan qatysty degen kúdikpen halyqaralyq izdeý jariialaǵan bolatyn.
"Tergeý málimetteri boiynsha onyń músheleri qorqytý jáne zorlyq-zombylyq jasaý arqyly kásipkerlerdiń múlkin, olardyń kompaniialardaǵy úlesterin tartyp alǵan, sondai-aq, kóleńkeli biznespen ainalysqan", - dep jazylǵan bolatyn málimette.
UQK operatsiiasy sheńberinde sheteldik áriptestermen tyǵyz is-qimyl jasai otyryp, top qatysýshylarynyń ornalasqan jeri anyqtaldy.
Kúdiktiler UQK "A" arnaiy maqsattaǵy qyzmetiniń jaýyngerleriniń aidaýylymen Astanaǵa jetkizildi jáne qylmystyq qýdalaý organynyń qyzmetkerlerine berilgen edi.
Aita keteiik, Almaty oblysynda Eldos Qospaevtyń ózi tutas bir shatqaldy basyp alyp, onda eshqandai ruqsatsyz naǵyz rancho turǵyzǵan degen derekter de bar. Bul múlikte ol jylqy ǵana ustamaǵan. Úidegi haiýanattar baǵynda aiý, tipti afrikalyq arystandar juby da bolǵan.
