Qor quryltaishysy atynan kiltti tabystaǵandar qatarynda «Saliqaly urpaq» direktory Qasym Qasabekov, «Asar-ume» qorynyń prezidenti Ashat Nurmashev, Qarasai aýdanynyń ákimi Jandarbek Dalabaev, qoǵam qairatkeri Shaverdi Babaev jáne taǵy da basqa tanymal blogerler boldy.
– Bizdiń «Saliqaly urpaq» qoǵamdyq qoryna 5 jyl bolyp otyr. Osydan bir 5 jyl buryn Bolat Ábishuly Nazarbaev aǵamyz osy qordy quryp, ata-babamyz salyp ketken dara joldy qaiyrymdylyq baǵytta elimizge áleýmettik, saiasi, dini, rýhani salada qyzmet etsin degen nietpen osy «Saliqaly urpaq» qoǵamdyq qordy qurǵan bolatyn. Sodan beri talai is-shara ótkizildi, áli de talai is atqarylady, – dedi «Saliqaly urpaq» qorynyń direktory Qasym Qasabekov.
– Men osy habardy estigennen beri keremet tolǵanysta boldym. Osyndai jomart jandarymyz kóp bolsyn. Bolat Nazarbaev aǵamyzdyń densaýlyǵy zor bolsyn. Biz siiaqty shynaiy muqtaj adamdarǵa baspana berip otyrǵan kópshilik jomart jandar, sizderge Alla razy bolsyn. Ózim shynymdy aitsam, tolqyp turmyn, joldasym ómirden ótkenine alty jyl bolyp edi, myna qyzdarmen 6-7 jyl boldy páter jaldap turyp jatqanymyzǵa. Kóp rahmet! – deidi ol.
Sonymen qatar, Bolat Nazarbaev qorynan 4 qaiyrymdylyq uiymy avtokólik, shaǵyn avtobýstar alyp, túrli nominatsiialar boiynsha músinshelermen marapattaldy. Olardyń arasynda «Syǵanaq» paralimpiadalyq sadaqshylar qoǵamdyq birlestigi, BTsP bar balalarǵa kómek kórsetetin «Arman Almaty» qory, «DAUA Charity» jáne «Qamqorlyq» qaiyrymdylyq qory bar. Uiymdastyrýshylar múgedektigi bar adamdardyń, BTsP bar balalardyń jáne t. b. qajettilikterin eskere otyryp, jaily kólik quraldaryn tańdady.
Saltanatty rásimde kontserttik baǵdarlamalar boldy, onyń aiasynda «Úshqońyr» folklorlyq-etnografiialyq ansambli, «Alataý serileri» toby, «Sát» tobynyń solisi jáne «Saliqaly urpaq» qory janynda jumys isteitin «Bereke úii» tárbielenýshileri óner kórsetti.
Anyqtama: «Saliqaly urpaq» qoǵamdyq qory 2016 jyly metsenat Bolat Nazarbaevtyń bastamasymen qurylǵan. Qor jumysy az qamtylǵan otbasylardy, múgedekter men jetimderdi qoldaýǵa baǵyttalǵan. Qor qarjylyq qoldaý, azyq-túlikpen, meditsinalyq quraldarmen jáne t.b. kómek kórsetý boiynsha birqatar jobalardy iske asyrýda.
