Prezident Qasym-Jomart Toqaev Qazaqstan halqy assambleiasynyń HHHIV sessiiasynda Qazaqstan men Reseidiń qarym-qatynasy týraly sóz qozǵady, - dep habarlaidy Dalanews.kz.
"Qazaq qashanda kórshisin qadirlei bilgen. Qýanyshta da, qiyndyqta da kórshisine súiengen, kórshiniń qasynan tabylǵan. "Kórshi aqysy – táńir haqysy" degen uǵym dinimizde jáne dástúrimizde bar. Bul – bizge atadan qalǵan ósiet, anadan berilgen qasiet. Halqymyzdyń tatý kórshilik dástúri áli de jalǵasyp keledi. Qonystas adamdar ultyna, dinine, tiline qaramastan aralasyp, quralasyp jatady. Qazaqstan kórshi memlekettermen dostyqty nyǵaita túsýge airyqsha mán beredi.
Resei – Qazaqstannyń burynnan kele jatqan negizgi strategiialyq seriktesi ári senimdi odaqtasy. Qytai elimen yqpaldastyq tamyry da tereńde jatyr. Qytai halqy qazaq halqyna eshqashan ziian keltirgen joq, bolashaqta da ziian keltirmeidi. Alataýdy teń jailaǵan qyrǵyzdar – bir týǵan baýyrlarymyz. Ejelden enshiles ózbek aǵaiyndy óz aǵam dep qadir tutamyz. Túbimiz bir dep túrikmenderdi týys sanap, shyn júrekten qurmetteimiz. Qart Kaspiidiń jaǵasyndaǵy ázerbaijan eline degen yqylasymyz da erekshe", - deidi Prezident.
Memleket basshysy óz sózinde kórshiles eldermen qarym-qatynas joǵary deńgeide damyp kele jatqanyn erekshe aityp ótti.
"Bir sózben aitsaq, kórshi eldermen qarym-qatynasymyz baýyrlastyq rýhynda damyp keledi. Bizdiń aramyzda túitkildi másele joq. Qazaqstan men Resei qurlyqtaǵy eń uzyn shekarany áýel bastan daý-damaisyz shegendep aldy. Jaqynda Qyrǵyzstan, Ózbekstan jáne Tájikstan uzaq jyl boiy sheshimin tappaǵan shekara máselesi boiynsha ortaq mámilege kelip, tarihi kelisimge qol qoidy dep aitýǵa bolady. Biz baýyrlas elder úshin qýanamyz, olardy árdaiym qoldaimyz.
Qazirgidei aýmaly-tókpeli zamanda aýyzbirshiliktiń qadiri arta túskeni sózsiz. Beibitshilik pen turaqtylyq – taǵdyrdyń bizge bere salǵan syiy emes. Bul – bir el, bir halyq bolyp atqaryp jatqan qajyrly eńbektiń jemisi. Biz syndarly sátte jurt bolyp jumyla bilemiz. Buǵan byltyr Aqtaý mańynda ushaq apaty bolǵanda taǵy bir márte kózimiz jetti. Azamattarymyz zardap shekken adamdardan kómegin aiaǵan joq. Kezekke turyp, qan tapsyrdy. Ázerbaijan Elshiligine baryp, gúl shoqtaryn qoidy. Búkil álem halqymyzdyń uiymshyldyǵy men janashyrlyǵyna tánti boldy. Halqymyzdyń júregi – keń, peiili – aq, nieti – taza. Meiirimdilik, qamqorlyq jáne tileýlestik – bizdiń ulttyq ereksheligimiz. Biz osy qundylyqtarymyzdy saqtap, óskeleń urpaqtyń boiyna sińirýimiz kerek", - deidi Qasym-Jomart Toqaev.
