Prezıdentke aımaqtyń negizgi áleýmettik-ekonomıkalyq kórsetkishteri, agroónerkásip, týrızm, taý-ken metalýrgıalyq kesheni, mashına jasaý, qurylys ındýstrıasy, energetıka jáne basqa da salalardaǵy ınvestısıalyq jobalar tanystyryldy.
Oblys ákiminiń esebin tyńdaǵan Memleket basshysy óńirdi damytýdyń basym baǵyttaryn belgilep berdi.
– Oblystyń aldynda birqatar mindet tur. Sonyń ishinde astyq jınaý naýqany. Árıne, bul naýqannyń sátti aıaqtalýy tabıǵatqa tikeleı baılanysty ekenin túsinemiz. Degenmen, tabıǵı jaǵdaılardyń keri áserin meılinshe azaıtyp, astyqty barynsha mol jınaý kerek. Bul – bir.
Ekinshiden, bıylǵy jaz ne kórsetti?! Mal sharýashylyǵymen aınalysatyn qojalyqtar mal satyp alyp, ózderin fermermiz dep ataıdy. Biraq jem-shóp qoryn ázirleýdi umyt qaldyrady.
Sizdiń baıandamańyzda bul máseleniń qamtylǵany durys boldy. Qazir osy túıtkildi sheshýmen aınalysý kerek, – dedi Qasym-Jomart Toqaev.
Memleket basshysy Qosshy aýylyna oblystyq mańyzy bar qala mártebesin berý týraly sheshimin túsindirdi.
– Jarlyqqa qol qoıyldy. Atalǵan qujatqa qol qoıylýyn jáne oblystyq mańyzy bar qala mártebesiniń berilýin kópshilik keńinen qoldap jatyr.
Biraq, osy sheshimniń máni men mańyzyn tek oblys kóleminde ǵana emes, jalpy elimiz boıynsha halyqqa qosymsha túsindirý kerek.
Bul sheshim, eń aldymen, Qosshy turǵyndarynyń ómirin jeńildetý maqsatynda qabyldandy. Onda qaǵaz boıynsha 40 myńǵa jýyq turǵyn ómir súredi.
Shyn máninde, ol jerde 80 myń adam turady. Olar turmystyq máselelerimen oblys ortalyǵy Kókshetaýǵa barýǵa májbúr bolady. Oǵan kóp ýaqyt, kúsh jumsaıdy. Árıne, bul turǵyndardyń júıkesin juqartady. Sondyqtan qalanyń ákimshilik mártebesin ózgertetin osyndaı sheshim qabyldandy. Men muny durys sheshim dep esepteımin, – dedi Prezıdent.
Qasym-Jomart Toqaev Kókshetaý qalasynyń turǵyndaryna bergen ýádesiniń oryndalýy jáne jylý elektr ortalyǵynyń qurylysyna kirisý qajet ekenin aıtty.
– Kókshetaý qalasy óz jylý elektr ortalyǵy joq, tek jylý qazandyqtary ǵana bar jalǵyz oblys ortalyǵy bolyp otyr. Bul jobanyń quny birneshe ese ósip, 240 mıllıard teńge boldy. Biz budan azdaý qarjyǵa josparladyq, biraq jýyrda tıisti sheshim qabyldanady. Bul oblys ortalyǵynda turatyn halyqtyń turmysyn jeńildetedi. Sondyqtan muny júzege asyrý kerek. Úkimet atalǵan sheshimdi aıaǵyna deıin jetkizedi dep oılaımyn, – dedi Memleket basshysy.
Prezıdent aýyl sharýashylyǵy mashınalaryn jasaý isin damytý máselesine nazar aýdaryp, Kókshetaý qalasy osy saladaǵy basty tirek ortalyqtardyń biri ekenin atap ótti.
– Bul – el ekonomıkasynyń asa mańyzdy ári perspektıvti baǵyty. Búgin men Qazaqstannyń aýyl sharýashylyǵy derjavasyna aınalýy tıis dep aıttym. Bul – órshil, biraq qol jetkizýge bolatyn maqsat. Osy rette oblystyń rólin asyra baǵalaý qıyn. Bul baǵytta biz memleketimizdiń aýyl sharýashylyǵy áleýetin kúsheıtýge baǵyttalǵan Aqmola oblysynyń kúsh-jigerin qoldaımyz, – dedi Qasym-Jomart Toqaev.
Memleket basshysy ákimdiktiń turǵyn úı qurylysy jónindegi josparyn qoldady. Onyń pikirinshe, áleýmettik turǵyn úı bólý máselesin retteý qajet.
– Turǵyn úı qurylysyna baılanysty máselelerdi neǵurlym kóp sheshsek, soǵurlym mundaı páter alǵysy keletin adamdar kóbeıe túsedi. Atalǵan máseleni retteý qajet. Eshqandaı negizsiz áleýmettik turǵyn úı kezegine turǵan adamdar tıisinshe elekten ótkizilýi kerek. Biraq, memlekettiń negizgi qyzmeti azamattardyń aldyndaǵy óz mindettemelerin oryndaý emes pe? Olardy áýre-sarsańǵa salýǵa múlde bolmaıdy, – dedi Prezıdent.
Qasym-Jomart Toqaev aýyl ákimderiniń tikeleı saılaýyn ótkizý týraly sheshimniń durystyǵyna taǵy bir márte toqtaldy.
Prezıdenttiń aıtýynsha, saılaý ashyq ári ádil ótti. Turǵyndar tarapynan eshqandaı shaǵym túsken joq. Aýyldaǵy aǵaıyn ózderiniń eldi mekenderin basqarýǵa qolaıly kórgen adamdaryn saılady.
– Endi, jergilikti ákimder ózderin saılaǵan azamattardyń aldynda tikeleı jaýap beredi. Olardyń óz baǵdarlamalary boldy. Sol baǵdarlamalardy júzege asyrýy qajet. Sonymen qatar oblys ákimderi saılanǵan azamattarǵa kómektesýi kerek.
Osy rette men myna máselege erekshe mán bergim keledi. Saılanǵan ákimder ózderiniń kezdeısoq saılanbaǵanyn ispen dáleldeýi qajet. Olar óz baǵdarlamalaryn sózben emes, ispen oryndaýǵa tıis. Ókinishke qaraı, biz kóp sóılep, az is atqaramyz. Al biz bul jaǵdaıdy 180 gradýsqa ózgertkenimiz jón. Iaǵnı, kóp istep, az sóıleýimiz qajet, – dedi Memleket basshysy.
