Qazaqstannyń Eńbek Eri, Qazaqstan jáne KSRO eńbek sińirgen artısi, Memlekettik syılyqtardyń ıegeri, kıno jáne teatr akteri ári rejıseri, teatr pedagogy, profesor, Teatrlar qaýymdastyǵynyń prezıdenti Asanáli Áshimov jeke qoljazbalaryn, marapattary men kitaptaryn, kınolarǵa túskende qoldanǵan baǵaly zattaryn Memlekettik arhıvke tapsyrdy, - dep habarlaıdy Dalanews.kz.

Mádenıet basqarmasy Memlekettik arhıvte "Kıno jáne teatr tarlany – Asanáli" mýzeı-buryshyn ashqan. Endi el azamattary Asanáli Áshimulyna qatysty 200-den asa qujat pen eksponatty tamashalap, zertteı alady.

Ol úshin arhıvke aldyn ala ótinim berý qajet.

"Eńbekpen kelgen ár zat men úshin baǵaly. Qarap otyrsam, munyń bári qazir – tarıh. Biz kóp bolsa júz jasarmyz, al bul zattar myń jasaıdy. Oǵan arhıv qyzmetkerleri uqypty qarap, olardyń joǵalyp ketýine jol bermeıdi. Munda jalǵyz meniń ǵana emes, basqa da tanymal adamdardyń zattary qoıylǵan. Bul jaqsy bastama. Ol keleshek urpaq úshin jasalyp jatyr. Ásirese, oqýshy, stýdentter úshin mańyzdy, kerek dúnıe. Sondyqtan buǵan oń kózben qaraǵan durys. Osy is-sharany uıymdastyryp otyrǵan azamattarǵa alǵys aıtamyn", – dedi Asanáli Áshimov.

Sharaǵa belgili zıaly qaýym ókilderi, Asanáli Áshimovtiń otbasy, týǵan-týys, jaqyn dostary men shákirtteri qatysty.