قازاقستاننىڭ ەڭبەك ەرى، قازاقستان جانە كسرو ەڭبەك سىڭىرگەن ءارتيسى، مەملەكەتتىك سىيلىقتاردىڭ يەگەرى، كينو جانە تەاتر اكتەرى ءارى رەجيسسەرى، تەاتر پەداگوگى، پروفەسسور، تەاترلار قاۋىمداستىعىنىڭ پرەزيدەنتى ءاسانالى ءاشىموۆ جەكە قولجازبالارىن، ماراپاتتارى مەن كىتاپتارىن، كينولارعا تۇسكەندە قولدانعان باعالى زاتتارىن مەملەكەتتىك ارحيۆكە تاپسىردى، - دەپ حابارلايدى Dalanews.kz.
مادەنيەت باسقارماسى مەملەكەتتىك ارحيۆتە "كينو جانە تەاتر تارلانى – ءاسانالى" مۋزەي-بۇرىشىن اشقان. ەندى ەل ازاماتتارى ءاسانالى ءاشىمۇلىنا قاتىستى 200-دەن اسا قۇجات پەن ەكسپوناتتى تاماشالاپ، زەرتتەي الادى.
ول ءۇشىن ارحيۆكە الدىن الا ءوتىنىم بەرۋ قاجەت.
"ەڭبەكپەن كەلگەن ءار زات مەن ءۇشىن باعالى. قاراپ وتىرسام، مۇنىڭ ءبارى ءقازىر – تاريح. ءبىز كوپ بولسا ءجۇز جاسارمىز، ال بۇل زاتتار مىڭ جاسايدى. وعان ارحيۆ قىزمەتكەرلەرى ۇقىپتى قاراپ، ولاردىڭ جوعالىپ كەتۋىنە جول بەرمەيدى. مۇندا جالعىز مەنىڭ عانا ەمەس، باسقا دا تانىمال ادامداردىڭ زاتتارى قويىلعان. بۇل جاقسى باستاما. ول كەلەشەك ۇرپاق ءۇشىن جاسالىپ جاتىر. اسىرەسە، وقۋشى، ستۋدەنتتەر ءۇشىن ماڭىزدى، كەرەك دۇنيە. سوندىقتان بۇعان وڭ كوزبەن قاراعان دۇرىس. وسى ءىس-شارانى ۇيىمداستىرىپ وتىرعان ازاماتتارعا العىس ايتامىن"، – دەدى ءاسانالى ءاشىموۆ.
شاراعا بەلگىلى زيالى قاۋىم وكىلدەرى، ءاسانالى ءاشىموۆتىڭ وتباسى، تۋعان-تۋىس، جاقىن دوستارى مەن شاكىرتتەرى قاتىستى.
