Prezident «Jańa adamdar» jastar forýmynda sóz sóiledi, - dep habarlaidy Dalanews.kz.
Forýmda «Jańa adamdar» qozǵalysynyń jetekshisi Ásel Badenova Prezidentke uiymnyń osyǵan deiin atqarǵan igi isteri men azamattyq bastamalaryn tanystyrdy. Onyń aitýynsha, qazirgi kezde qozǵalystyń 19 qalada kampýsy, 15 myńǵa jýyq belsendi múshesi bar. Qozǵalys elimizde ondaǵan azamattyq bastamalar men aktsiialardy uiymdastyryp úlgergen. Jastar vandalizmmen, ruqsat etilmegen jerge qoqys tógýshilermen, kámeletke tolmaǵan balalarǵa ishimdik satýshylarmen, esirtki taratýshylarmen jáne basqa da áleýmettik keseldermen kúres júrgizip, ózderiniń azamattyq ustanymdaryn ashyq ári belsendi bildirip júr.
Memleket basshysy forýmǵa jinalǵan jalyndy jastardyń boiyndaǵy Otanǵa, elge degen súiispenshilik pen qurmetke rizashylyǵyn bildirip, kózi ashyq, kókiregi oiaý azamattardyń ár jetistigine qýanatynyn, ár bastamasyn qoldaitynyn jetkizdi.
– Qazaqstannyń jastary – jasampaz. Men muny únemi aityp júrmin. Jańa ǵana óte jaqsy oilar aityldy. Tyń ideialar, igi bastamalar bar. Sizderdiń sózderińizdi tyńdap, forým atmosferasyn sezine otyryp, keýdemdi maqtanysh kernedi. Qazaqstannyń bolashaǵyna degen senimim nyǵaia tústi. «Jas kelse – iske» dep beker aitpaǵan. Elimizdiń keleshegi oiy ushqyr, bilimi tereń, kózqarasy zamanaýi jastardyń qolynda. Men Prezident retinde Sizderge zor úmitpen qaraimyn, – dedi Qasym-Jomart Toqaev.
Prezident qazir elimiz úshin tarihi kezeń ekenine, aldymyzda biik maqsattar turǵanyna nazar aýdardy.
– Biz jurttan kósh ilgeri júretin el bolamyz. Úirenetin de, úiretetin de ult bolamyz. Jastar barlyq ózgeristiń bastaýynda turady. «Jańa adamdar» – jańa qoǵamnyń ainasy. «Jańa adamdar» – jańa bolmys! Bul – óz eline adal jastardyń qozǵalysy! Bizdiń strategiiamyzǵa qoldaý bildirgen sizderge alǵys aitamyn. Reformalarymyzdyń mán-mańyzy urandaryńyzda kórinis tapqan. Bul ózgerister Ádiletti Qazaqstandy qurý, «Zań men tártipti» qamtamasyz etý tujyrymdamasyna negizdelgen, – dedi Memleket basshysy.
