Densaýlyq saqtaý ministri Eljan Birtanov Almatyǵa keldi. Jýrnalistermen jolyǵyp meningokokk infektsiiasy jaily anyq-qanyq aitty.
«Qazirgi tańda el boiynsha meningitke shaldyqqan 59 adamdy tirkeýge aldyq. Sońǵy bir kúnde aýrýdy juqtyrǵan adamdardyń sany bireýge artqan. Aýrý asqynyp turǵan Almaty sońǵy úsh kúnde tynysh. Qandai da bir oqiǵa tirkelgen joq», – deidi Birtanov.
Ministr dertke shaldyqqandarǵa alǵashqy meditsinikalyq kómek kórsetýde kemshiliktiń bolǵanyn moiyndady.
«Úkimetbasy óńirlerdegi naýqastarǵa kómek kórsetilý boiynsha naqty tapsyrma bergen. Bul boiynsha qalalyq jáne aýdandyq aýrýhanalardy tekserdik. Shynymen de shikilikter kóp eken.
Kóp jerde Densaýlyq saqtaý ministrligi bekitken standarttarǵa atústi qaraǵan. Talapqa sáikes, jaǵdaiy asa aýyr naýqasty alysqa tasymaldamai, jaqyn jerdegi meditsinalyq mekemege jetkizýge tiis jedel járdem.
Jaǵdaiy ońalǵansha, naýqasqa qajetti em-domdy sol aradan alýy qajet. Bul tek meningitke qatysty emes ekenin eskertemin, ózge de dertterge qatysty tirkelgen faktiler bar.
Qaitalap aitaiyn: shuǵyl meditsinalyq kómek turǵylyqty meken-jaiǵa qaramastan kórsetilýi qajet. Meken-jaidy bylai qoiyp, azamatyqqa qaramaýy tiis”, – dedi Eljan Birtanov.
Almaty men oblystaǵy birqatar aýrýhanany aralap shyqqan Birtanov bulardyń kópshiliginde infektsiialyq bólimniń joq ekenine kóz jetkizipti. Saldarynan naýqastar amalsyz Qaskeleńdegi infektsiialyq aýrýhanaǵa jetkizilip otyrǵan.
“Bul máseleni sheshtik. Talǵar aýrýhanasynda infektsiialyq bólim ashyldy. Esikte ol burynnan bar eken. Jańa ǵana Qaskeleńde bolyp qaittyq. Bul jerde infektsiialyq aýrýhana bar. Biraq, azdyq etedi. Osy sebepti sonyń janynda ornalasqan ortalyq aýrýhanada da infektsiialyq bólim ashylsyn degen buiryq berdim. Almaty oblysynyń sheshimimen, barlyq aýdandyq aýrýhanalarda koikalar qoiyldy”, – dedi Birtanov.
