2024 jyldyń basynan beri zańsyz maınerler jalpy 1,3 mlrd teńgege zalal keltirgen 17 qylmystyq is tirkeldi, dep habarlaıdy Dalanews.kz.

Eń jıi anyqtalǵan zańsyz maınıng fermalary Astana qalasynda – 6, Shymkent pen Qostanaıda – 3 jaǵdaıdan tirkelgen.

Atalǵan ister aıasynda 642 myń AQSH dollary kólemindegi sıfrlyq aktıvter tárkilendi.

Aıta ketý kerek, keıbir zańsyz maınıng fermalary elektr energıasyn urlaý arqyly jumys istegen (5 ferma). Olardyń tutynǵan energıa kólemi iri qalanyń shyǵynyna teń. Sondaı-aq fermalar ornalasqan aımaqtardaǵy turǵyndardyń tynyshtyǵyn buzý faktileri tirkelgen.

Elektr energıasyn zańsyz tutyný saldarynan resýrstar naqty bıznes-jobalarǵa, ónerkásipti damytýǵa jáne áleýmettik nysandardy qamtamasyz etýge baǵyttalmaıdy.

Sonymen qatar, Memlekettik kirister komıtetiniń derekterine sáıkes, sońǵy úsh jylda maınıng salasynan búdjetke 17 mlrd teńgeden astam qarajat túsken. Bul salaǵa tıimdi retteý qajettigin kórsetedi.

Agenttik Qazaqstanda maınıngpen aınalysý tek lısenzıa bolǵan jaǵdaıda ǵana ruqsat etiletinin eske salady. Zańdy qyzmet úshin jabdyqtyń sáıkestigi, energıamen jabdyqtaý sharty jáne salyqtyq mindettemelerdiń oryndalýy talap etiledi.

Zańsyz maınıng - qylmystyq jaýapkershilikke ákelip soǵady, eldiń ekonomıkalyq qaýipsizdigine nuqsan keltirip, energıamen jabdyqtaýdaǵy aqaýlarǵa sebep bolady.