Senat kýlýarynda Ǵylym jáne joǵary bilim ministri Saiasat Nurbek biryńǵai ýaqyt beldeýiniń qazaqstandyqtarǵa qalai áser etip jatqanyna qatysty ǵylym zertteý júrgiziletinin málimdedi, - dep habarlaidy Dalanews.kz Massaget.kz-ke siltep.
"Biz ózimizdiń eń úzdik institýttarymyzdy tartamyz - geografiia institýtymyz óte jaqsy, ol osy máselelermen ainalysady, sondai-aq, Densaýlyq saqtaý ministrliginiń fiziologiia men meditsinalyq bóligine qatysty birneshe institýttar qatysady. Joǵary ǵylymi-tehnikalyq komissiia (JSTK) óz otyrysyn ótkizip, bul taqyrypty talqylaýǵa shyǵarady. Eger qoldaý tapsaq, onda birden konkýrs jariialap, zertteý jumysyn bastaimyz. Zertteý konsortsiým arqyly júrgiziledi", - dedi ministr.
Ministr zertteýge bólinetin qarjynyń naqty kólemin atamady.
"Bólingen qarajat somasy týraly naqtylaý kerek, biraq onyń kólemi úlken emes. Aldymen zertteýge jalpy limitti anyqtap, sodan keiin konkýrs protsedýralary - ǵylymi keńester, ótinimder jáne basqa da rásimder júrgiziledi", - dedi Saiasat Nurbek.
Eske salaiyq, 2024 jyly 29 aqpannan 1 naýryzǵa qaraǵan túni Úkimettiń "Qazaqstan Respýblikasynyń aýmaǵynda ýaqytty esepteý tártibi týraly" Qaýlysyna sáikes eldiń búkil aýmaǵy biryńǵai saǵattyq beldeýge kóshti. Sodan beri Qazaqstannyń 16 oblysy 5 saǵattyq "UTC+5" beldeýinde ornalasty. Alaida budan keiin saǵat tilin keri jyljytý týraly petitsiia paida boldy.
Buǵan deiin premer-ministrdiń orynbasary Serik Jumanǵarin petitsiia 50 myń daýys jinaǵanda qandai sheshim qabyldanatyny týraly saýalǵa jaýap bergen edi.
"Petitsiia 50 myń daýys jinasa, biz arnaiy jumys tobyn quryp, belgilengen tártipte memlekettik organdar men sarapshylardy tarta otyryp, ony qaraityn bolamyz. Men qazir aldyn ala eshteńe aita almaimyn. Onyń 50 myń daýys jinaǵanyn kúteiik", - dedi ol.
