Birer kún buryn áleýmettik jelide videosy taraǵan akter, ázilkesh Ǵalymjan Qurmanbek «Qarasai batyr, Qabanbai batyr, Bógenbai batyr jer úshin emes, Islam dini úshin soǵysty» dep aidy aspanǵa bir-aq shyǵarǵan bolatyn. Ázilkesh atymen jurtqa tanylǵan Ǵalymjannyń bul sózderi jurttyń renishin týdyryp, ony aitqan sózderi úshin zań aldynda jaýap berin talap etip, resmi shaǵym túsirmek, - dep habarlaidy Dalanews.kz Democrat.kz aqparattyq portalyna silteme jasap.
Dál qazirgi kezde qoǵam belsendileri, jýrnalist, zańger, tarihshy, dintanýshylardan qurylǵan bir top azamat resmi shaǵymdy ázirleý ústinde.
Qazaqtyń ien dalasynda qolǵa ustar, kózben kórer naqty dálel retinde kúni búginge deiin jatqan tańbaly tastardy aitpaǵanda, qazaq jerin qorǵaǵanyn aiǵaqtap, móri basylyp, tarihi tulǵa retinde tanylǵan Qarasai, Qabanbai, Bógenbai batyrlarymyz din úshin emes, qazaqtyń dalasyn qorǵaý jolynda soǵysqany álemge málim.
Ókinishke qarai, dini nanym-senimin ulttan joǵary qoiatyn keibireýler osyǵan deiin salt-dástúrimizdi, ádet-ǵurpymyzdy joqqa shyǵarǵany azdai, endi mysyqtaban júrispen tarihymyzǵa da aýyz salmaq nietine kóshkendei.
Myń jerden áldebir tylsymǵa senip, áldebir dinge bas ursaq ta, atadan balaǵa mura bolyp qalǵan tarihty joqqa shyǵarý — tutas ultqa jasalǵan qastandyq emes pe? Tarihty burmalaý arqyly Ǵalymjan Qurmanbektiń kózdegen maqsaty ne?
Videoda qanshama jastyń ony tyńdap otyrǵanyn eskersek, osyndai sózder arqyly jastardyń sanasynan tarihi shyndyqty óshirýge ábden bolatynyn bárimiz bilemiz. Olai bolsa din ókiliniń bul jolǵy maqsaty kimge bolsa da túsinikti shyǵar?!
