Oǵan sáıkes, 21 myń teńgelik járdemaqyǵa kópbalaly otbasylar ǵana emes, bir balasy bar analar da ilige alady.
«Ataýly áleýmettik kómek kópbalaly jáne az qamtylǵan otbasylarǵa berilýi shart. Bul - Prezıdenttiń tapsyrmasy.
Al áleýmettik jaǵynan az qamtylǵan otbasyda bir bala nemese eki bala bolýy múmkin ǵoı. Ondaı otbasylardyń bir aılyq tabysy adam basyna shaqqanda 20 789 (kúnkóris mınımýmnyń 70 prosenti - avt.) aspasa, bir balaǵa 21 myń teńgege jýyq járdemaqy taǵaıyndalady», - dedi mınıstrliktiń baspasóz qyzmetkerleri. Osy oraıda mamandar bir balasy bar otbasyna jańa járdemaqy tóleýge qatysty mysaldy da keltirdi.
Máselen, bir áıel jalǵyz balasyn asyrap otyr. Al onyń bir aılyq jalaqysy 40 000 teńgeni quraıdy. Osy aqshany eki adamǵa bólgende týra 20 000 myńnan keledi. Demek, otbasynyń bir aılyq tabysy adam basyna shaqqanda kúnkóris mınımýmnyń 70 prosenti - 20 789 teńgeden aspaıdy.
Zań boıynsha balaǵa 21 myń teńgeniń járdemaqy tólenýi kerek.
«Al anasyna 20 000 men 20 789 teńgeniń aıyrmashylyǵy tólenedi. Sonda balanyń járdemaqysyn qosqanda atalǵan otbasy aı saıyn 22 myń teńgege jýyq ataýly áleýmettik kómekti alyp turady», - dep atap kórsetti mamandar.
Aıta keteıik, «Nur Otan» partıasynyń XVIII sezinde QR Prezıdenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek.
Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deıin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin.
Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar jaǵdaı jaqsy azamattar bolyp shyǵa keledi», - degen bolatyn N.Nazarbaev.
Jaqynda Memleket basshysy atalǵan sharalardy 1 sáýirden bastaýdy mindettedi.
QR Eńbek jáne xalyqty áleýmettik qorǵaý mınıstri Berdibek Saparbaev balalarǵa beriletin 21 myń teńgeden bólek ata-anasyna da qosymsha aqy tólenetinin jetkizdi. Búginde elimizde kúnkóristiń mınımýmy 29 698 teńgeni quraıdy.
Osy ýaqytqa deıin ataýly kómekti bir adamǵa shaqqanda kúnkóris deńgeıiniń 50 prosentinen, ıaǵnı 14 849 teńgeden aspaıtyn otbasylar alsa, endi Prezıdenttiń tapsyrmasy boıynsha atalǵan kórsetkish 70 prosentke - 20 789 teńgege deıin kóterilip otyr.
Demek, kópbalaly otbasynyń jalpy tabysyn árbir adamǵa bólgende aqshanyń somasy kúnkóris deńgeıiniń 70 prosentine, ıaǵnı 20 789 teńgege jetpese, árbir balaǵa 21 myń teńgeniń járdemaqysy beriledi.
«Sosyn eger januıanyń árbir adamyna shaqqanda tabys kúnkóris deńgeıinen (70 prosentten - avt.) tómen bolsa, aıyrmashylyq 10 myń teńge bola ma, 7 myń teńge bola ma, sol ata-anasyna da qosymsha tólenedi.
Odan keıingi eń úlken jeńildik, buryn tabysty eseptegende «Altyn alqa» «Kúmis alqa», kóp balaǵa beriletin járdemaqy, múgedekterdiń járdemaqysy men stıpendıasy sanalatyn. Endi, sonyń bárin esepke almaıdy», - deıdi B.Saparbaev. Buǵan deıin QazAqparat tilshisi atalǵan járdemaqyny taǵaıyndaýdyń tártibin saraptap shyqqan bolatyn. Zań boıynsha ataýly áleýmettik kómek 23 jasqa deıin tólenedi.
Derekkóz: Qazaqparat
